Igor Zakýrdaev: «Senimdi aqtaýǵa tyrysamyz»

Taý shańǵysy sportynan Qazaqstan quramasy Sochı Olımpıadasynyń tórt lısenzııasyna ıe boldy. El namysyn qorǵaýǵa Igor Zakýrdaev, Dmıtrıı Koshkın, Martın Hýber jáne Ekaterına Cherepanova bel býyp otyr. Biz endi daıyndyq barysy jóninde Igor Zakýrdaevpen az-kem tildesken edik. – Taý shańǵysy sportynyń basty erek­she­ligi qandaı? – Bul sportqa bala kezimnen qyzyqtym. Ata-anam meniń osy yqylasymdy baıqa­ǵan bolýy kerek, ózderi tanıtyn jattyq­ty­rýshynyń qaramaǵyna berdi. Sóıtip, týǵan qalam Rıdderde alǵashqy daıyndyqty bas­tap kettim. Negizi, taý shańǵysy sporty bes túrge bólinedi. Olardyń árqaısysynyń bıiktigi, uzyndyǵy, jyldamdyǵy bolady. Al men alys shaqyrymdy júrip ótkendi qa­laımyn. Eger jyldamdyqty baǵyndyra bil­meseń, kezdeısoq jaraqat alýyń múm­kin. Sondyqtan, árbir qımylyńdy sheberlikpen oryndaýyń kerek. Bizde qazir sla­lomǵa daıyndalýdyń múmkindigi bolmaı tur. Aldaǵy ýaqytta bul olqylyq retke keler degen senimdemin. О́ıtkeni, tabıǵaty ásem taý­ly aımaq Almaty qalasy men Almaty, Shy­ǵys Qazaqstan oblystarynda osy sport túrin damytýǵa negiz bar. – Jalpy, bıyl Olımpıadaǵa daı­yn­dyq qaı jerde ótkizildi? – Daıyndyq 3 kezeńge josparlandy. Sonyń alǵashqysy Avstralııada ótki­zi­lip, onda biz 20 kún daıyndaldyq. Odan ári Ys­tyq­kól aýmaǵy men Chılı taýynda daıyn­dalýdyń sáti tústi. Osynyń nátıjesinde men Ońtústik Amerıkada ótkizilgen jarysta jaqsy jetistikke qol jetkizdim. Jalpy aıtqanda, bizdiń Olımpıadaǵa daıyndyǵymyz jaman emes. Osy tusta qatarymyzǵa qosylǵan Martın Hýberdiń jeke jattyqtyrýshysy retindegi ákesi de bizdiń tyńǵylyqty daıyndalýymyzǵa bar jaǵdaı jasaǵanyn atap ótkim keledi. – Sochıde taý shańǵysy sportynan kim­derdiń desi basym bolady dep oılaısyz? – Jarys jolynda kimniń joly bolatynyn naq qazir dóp basyp aıtý qıyn. Alǵashqy otyzdyqqa enýdiń ózi jaqsy jetistik der edim. Eger men qatelespesem, taý shańǵysy sportynan Álem kýbogynda eshqaısysy otyzdyqqa ilingen joq. Soǵan qaramastan, Avstrııa eli ózgelerge qaraǵanda, kósh ilgeri keledi. Fransııa, Shveısarııa, Italııa, Slo­venııa men Horvatııa sportshylarynyń da daıyndyǵy jaman emes. – Sonda olardyń deńgeıine jetý úshin ne isteýimiz qajet? – Shyndyǵyn aıtsam, osy sport túrin damytý boıynsha biz olardan 15-20 jyldaı artta qaldyq. Ekinshiden, bizdi tájirıbesi mol shetel jattyqtyrýshylary daıyndaýy qajet. Degenmen, Sochıde ótkiziletin Olımpıadada joǵary jetistikke jetý úshin bar kúshimizdi jumsaımyz. Áńgimelesken Ámirhan ALMAǴANBETOV. «Egemen Qazaqstan».