Qazaq halqynyń uly perzenti, memleket jáne qoǵam qaıratkeri Turar Rysqulovqa arnalǵan «Qyzyl jebe» atty tarıhı serıal túsirilip bitti, dep jazady Egemen.kz.
Fılmde 20-shy ǵasyrdyń basyndaǵy Patshalyq reseıden ketkennen keıingi qazaq memleketiniń qalyptasý kezeńi baıandalady. Fılmniń bas prodıýseri Ilııas Ysqaqov maqsatymyz sol kezdegi qazaq zııalylarynyń el erteńi úshin atqarǵan eńbekterin búgingi urpaqqa jetkizý boldy deıdi.
«Sol kezde Túrkistan respýblıkasyn jáne Alashorda memleketin qurý degen máseleler kóterildi. Sol kezdegi Turar men alashordalyqtar arasyndaǵy kelispeýshilikter de osy fılmde aıtylady. Degenmen negizgi ıdeıa Rysqulovty sol kezdegi ult janashyrlarynan bólip-jarý emes, barlyǵynyń oıy qazaq elin qalaı jeke memleket etemiz degenderin kórsetý boldy. Alashorda, Túrkistan respýblıkasy bolamyz degenderdiń barlyǵy qazaqtyń bolashaǵyn, erteńin oılady. Jer tutastyǵyn saqtap qalý boldy, mine sol joldaǵy qııan-keski kúresin kórsetkimiz keldi», deıdi ol.
Sonymen qatar ol Turar Rysqulov jaıly buǵan deıin aıtylmaı kelgen biraz tyń dúnıeler osy fılmde kórsetiletinin jetkizdi. Ásirese, Túrkistan memleketin qurý jolynda Turardyń Muhamedjan Tynyshbav, Mustafa Shoqaımen kezdesken sátetteri fılmde kórsetiledi.
Ssenarıı Sherhan Murtazanyń «Qyzyl jebe» shyǵarmasy jelisimen jazylǵan.
Fılmde Turar Rysqulovtyń rólin – Syrym Qashqabaev, ákesi Rysquldy – Erkebulan Daıyrov, Sherhan Murtazany – Aldabek Shalbaev oınaıdy. Jobanyń jetekshisi, ıdeıa avtory – Nurjan Jalaýqyzy.
Aqparat jáne qoǵamdyq damý mınıstrliginiń tapsyrysymen túsirilgen atalǵan fılm qazan aıynyń 11-nen bastap «Almaty» telearnasynan kórsetiledi.