Halyqaralyq kezdesýler

Qazaqstan Premer-Mınıs­tri­niń orynbasary – Syrtqy ister mınıstri Muhtar Tileýberdi, AQSh Memlekettik hatshysy En­to­nı Blınken, Qyrǵyzstannyń Syrtqy ister mınıstri Rýslan Kazakbaev, Tájikstannyń Syrt­qy ister mınıstri Sıro­djı­ddın Mýhrıddın, Túrik­mens­tannyń Syrtqy ister mı­nıs­tri Rashıd Meredov jáne О́zbek­stannyń Syrtqy ister mınıs­tri Abdýlazız Kamılovtiń qa­ty­sýymen «S5+1» mınıstrlik kezdesýi ótti.

Syrtqy saıası vedomst­vo­la­rdyń basshylary «S5+1» óńirlik dıplomatııalyq platfor­m­­asynyń Aýǵanstandaǵy daǵ­da­rysty jaǵdaıdy sheshýde, aımaq­taǵy elderdiń COVID-19-ǵa qarsy kúsh-jigerin birik­ti­rýde, ekonomıkalyq ózara yn­ty­maqtastyq salasyndaǵy múm­kin­dikterdi iske asyrýda jáne k­lımattyq daǵdarysqa qar­sy kúreste mańyzdy ról at­qa­­­ratynyn atap ótti. Kezde­sý­de Aýǵanstannan ketkisi ke­le­tin sheteldik azamattar men aýǵandyqtardyń qaýipsiz­di­gin qamtamasyz etý men eldiń ınk­lıý­zıvti úkimetin qalyp­tas­ty­rý máselesi kóterildi.

Qazaqstan SIM basshysy «S5+1» óńirlik qaýipsizdikti talqylaýda, Ortalyq Azııa mem­le­ketteriniń arasynda jáne AQSh-pen ózara tıimdi baılanys­ty arttyrýda  tıimdi platforma retinde tanylǵanyn atap ótti. 

Sondaı-aq kezdesýge qatysý­shy­lar Qazaqstannyń «S5+1» elderiniń tabıǵatty qorǵaý vedomstvolary basshylarynyń kezdesýin shaqyrý jónindegi bas­tamasynyń der kezinde uıym­das­tyrylǵanyn, olardyń prak­tıkalyq qorytyndylary eko­nomıkalyq ósýge yqpal ete­tinin alǵa tartyp, óńirlik ener­getıkalyq baılanystar men ener­gııa tıimdiliginiń berer múm­kin­dikteri jaıynda sóz qozǵady.

«S5+1» kezdesýi Ortalyq Azııadaǵy jańa syn-qaterler men qaýipterdi, ekologııalyq prob­lemalardy sheshý jónindegi bir­lesken sharalardy, sondaı-aq óńir deńgeıindegi áreketti talap etetin saýda-ınvestısııalyq baılanystardy keńeıtý joldaryn talqylaýǵa múmkindik berdi.

Sonymen qatar Muhtar Tileýberdi AQSh Memlekettik hat­shy­synyń Ońtústik jáne Ortalyq Azııa isteri jónindegi kómekshisi Donald Lý jáne AQSh Ulttyq qaýipsizdik keńesiniń Reseı jáne Ortalyq Azııa boıynsha keńsesiniń aǵa dırektory Erık Grınmen kezdesti.

Kelissózder barysynda eki­jaq­ty, óńirlik jáne halyq­ara­lyq ózekti máseleler, sonyń ishinde asa joǵary deńgeıdegi baı­lanystar, Aýǵanstandaǵy qa­zirgi jaǵdaı men aýǵanaralyq dıalogti ilgeriletý sekildi má­se­leler talqylandy.

«Qazaqstan men AQSh arasynda dıplomatııalyq qaty­nas­tardyń ornaǵanyna 30 jyl tolýynyń qarsańynda Qazaqstan aldaǵy ýaqytta da ekijaqty jáne kóp­jaqty formattaǵy ózara tıim­di yntymaqtastyqty ke­ńeı­tý bo­­ıynsha amerıkalyq tarappen birlese jumys isteıtinin atap ótkim keledi», dedi Muhtar Tileýberdi.

Aq úı ókilderi USAID pen KazAID arasyndaǵy, onyń ishinde Aýǵanstanǵa gýma­nı­tar­lyq kómek kórsetý aıasyn­daǵy ózara is-qımyldyń mańyz­dy­lyǵyn atap ótti. Qazaqstannyń COVID-19-ben kúrestegi jáne koronavırýsqa qarsy óz vaksınasyn jasaýdaǵy jetistikterine joǵary baǵa berildi.

Odan bólek,  Muhtar Tileýberdi Moldova Syrtqy ister mınıstri Nıkolaı Popeskýmen, Shrı-Lanka Syrtqy ister mınıstri Gamını Lakshman Peırıspen, BAÁ Indýstrııa jáne jańa teh­no­logııalar mınıstri jáne Klı­mat jónindegi arnaıy ókili Sultan Ahmed ál-Jabermen, Rýmynııanyń Syrtqy ister mı­nıs­tri Bogdan Aýreskýmen jáne Bahreın Syrtqy ister mınıstri Abdýllatıf ál-Zaıanımen eki­jaq­ty kelissózder ótkizdi.