Qazaqstand 15,4 mln gektar (96,8%) jerdegi dándi jáne dándi-burshaqty daqyl oryldy, dep jazady Egemen.kz.
«Ortasha ónimdilik gektaryna 9,6 sentnerden aınalyp, 14,8 mln tonna astyq jınaldy. Onyń 11,6 mln tonnasy bıdaı. Sondaı-aq 616,7 myń tonna maıly daqyl, 2,9 mln tonna kartop, 4,1 mln tonna kókónis, 2,6 mln tonna baqsha daqyldary jınaldy», dep habarlaıdy QR Aýyl sharýashylyǵy mınıstrligi.
Astyq egetin negizgi aımaqtar – Aqmola, Qostanaı jáne Soltústik Qazaqstan oblystarynda 11,5 mln gektar egis alqaby oryldy. Bul jınalýy tıis jaly alańnyń 98,9%-y. Ortasha ónimdilik gektaryna 8,8 sentnerden aınalyp, 10,0 mln tonna astyq jınaldy.
Naqtylanǵan derek boıynsha, respýblıkada syıymdylyǵy 29,3 mln tonna astyq saqtaıtyn múmkindik bar. Onyń ishinde astyq qabyldaý kásiporyndarynda -12,4 mln tonna, fermerlerde 16,9 mln tonna astyq saqtaıtyn oryn bar.
«2021 jylǵy egin jınaý naýqany aıaqtalýǵa jaqyn jáne qarqyny byltyrǵydan joǵary. Jıyn-terim jumystaryna qatysty barlyq másele mınıstrliktiń baqylaýynda», dep jazylǵan habarlamada.