Nur-Sultan qalalyq memlekettik akademııalyq fılarmonııasynyń Halyq áni bóliminiń jańa maýsymy belgili ánshi-kompozıtor Tursynǵazy Rahımovtiń týǵanyna jetpis jyl tolýyna arnalǵan «Sábı bolǵym keledi» atty án keshimen ashyldy.
Abaı, Muhtar, Shákárim sekildi ulylar týǵan topyraqta ósken daryndy ónerpazdyń qazaq án ónerinde alar óz orny bar. Ardaqty azamattyń ózi óner jolynda tálimin kórgen «úsh ustazy» týraly: «Men Júsipbek Elebekovtiń shákirti bolǵanyma baqyttymyn. Ol kisi únemi: «sen sazgerlikpen aınalysasyń» dep aıtatyn, sol kisiniń kóregendigi me, men on jyldan keıin án shyǵara bastadym. Ekinshi ustazym, rejısser Esmuhan Obaev: «Seni asyraıtyn qara dombyrań» deıtin, ol maǵan talaı ról berip sahnaǵa shyǵardy. Úshinshi ustazym – kompozıtor Temirjan Bazarbaev. 1979 jyly alǵash ánim «Sábı bolǵym keledini» jazǵanda aq batasyn berip, kóp tárbıelegen tálimgerim edi...» dep aıtqan eken.
Tursynǵazy aǵamyz aqıyq aqyn Muqaǵalı Maqataevtyń biraz óleńderine án jazdy, sonyń ishinde elge keńirek tanylǵan «Sábı bolǵym keledi», «Darıǵa, dombyramdy bershi maǵan», «Qazaǵym-aı», «Aıagóz arý», «Otyzdan asyp baramyn», «Men seni saǵynǵanda», «Sanaýly kún», «Neni ańsaımyn» degen týyndylaryn erekshe aıtýǵa bolady. Kompozıtordyń «Sábı bolǵym keledi» degen atpen ánder jınaǵy da jaryq kórgen.
Aıta keteıik, talantty tulǵany eske alýǵa arnalǵan jyp-jyly áserge toly án keshin elordalyq fılarmonııa Semeı qalasy ákimdiginiń qoldaýymen birge uıymdastyrdy. Konsert barysynda atalǵan óner mekemesiniń «Halyq áni» bóliminiń ánshileri − Qazaqstannyń eńbek sińirgen qaıratkerleri Gúlzıra Bókeıhan, Aıgúl Qosanova, Gúlmıra Sarına, Mádenıet salasynyń úzdikteri Seken Syzdyqov, Nuraı Tanabaev, Berik Omarov, halyqaralyq jáne respýblıkalyq baıqaýlardyń laýreattary Danııar Muqan, Perızat Turarova, Sáýlejan Taǵzııa, О́zgeris Sherikbaı, osy bólimniń kórkemdik jetekshisi – Telman Nurkenov, fılarmonııanyń «Shalqyma» halyq bı ansambli, «Saryarqa» folklorlyq ansambli óner kórsetip, keshtiń kórigin qyzdyrdy.
Al Qazaqstannyń eńbek sińirgen qaıratkerleri Ramazan Stamǵazıev, Erkin Shúkimanov, Klara Tólenbaeva, Tolǵanbaı Sembaev, Narıman Abdrahmanov keshke qonaq retinde qatysyp, sazdy naqyshqa toly ánderimen tyńdarmandarynyń qulaq quryshyn qandyrdy.