Almatyda koronavırýs juqtyrǵan 82 bala aýrýhanada jatyr, dep jazady Egemen.kz.
26 qyrkúıek kúngi aqparat boıynsha, bir táýlikte qalada 485 adam koronavırýs juqtyrǵan. Munyń ishinde sımptomdy, jeńil jáne ortasha deńgeıdegi belgilermen – 432, sımptomsyz – 53 naýqas tirkeldi. Barlyq emdelip shyqqandar – 72, kelip túskeni – 121.
«Infeksııalyq stasıonarlarda 2 098 adam bar (tósek-orynnyń jalpy sany –5230), onyń ishinde 82 bala emdelýde. Reanımasııa jáne qarqyndy terapııa bóliminde 202 adam jatyr», dep habarlady Qoǵamdyq densaýlyq basqarmasynyń baspasóz qyzmeti.
Al 39 naýqas jasandy tynys alý apparatyna qosylǵan. Invazıvti emes jasandy tynys alý apparatynda 82 adam em qabyldap jatyr.
High flow-da 55 apparat jumys isteıdi. Medısınalyq-sanıtarııalyq alǵashqy kómek mobıldi brıgadalarynyń jáne Telemedısına ortalyǵynyń ambýlatorııalyq baqylaýynda 4864 pasıent bar. Onyń ishinde indet belgileri bar, ortasha aýyr jaǵdaıda – 4702 naýqas. 162 adamda koronavırýs belgileri joq.