Májilis Tóraǵasy Nurlan Nyǵmatýlın Qazaqstanǵa resmı saparmen kelgen Túrkııa Uly Ulttyq Jınalysynyń Tóraǵasy Mustafa Shentoppen kezdesti, dep jazady Egemen.kz.
Májilis spıkeri Túrkııanyń Qazaqstan táýelsizdigin birinshi bolyp moıyndaǵan el ekenin aıta kele, QR Tuńǵysh Prezıdenti-Elbasy Nursultan Nazarbaevtyń baýyrlas elmen qarym-qatynasty ilgeriletýge erekshe nazar aýdarǵanyn atap ótti. Nurlan Nyǵmatýlınniń aıtýynsha, búginde Memleket basshysy Qasym-Jomart Toqaev ta Nur-Sultan men Ankara arasyndaǵy seriktestikti nyǵaıtý jumysyn jalǵastyryp jatyr.
Bul rette Májilis Tóraǵasy Qazaqstan Táýelsizdiginiń 30 jyldyǵy qarsańynda Túrkııa parlamenti tóraǵasynyń resmı sapary baýyrlas elder arasyndaǵy shynaıy dostyq pen syılastyqtyń jarqyn kórsetkishi ekenin atap ótti.
«Qazaqstan - Túrkııa úshin erekshe memleket. Eki el arasyndaǵy qarym-qatynastyń qalyptasýy men damýynda mańyzdy ról Qazaqstannyń Tuńǵysh Prezıdenti-Elbasyǵa tıesili. Al bizdiń baýyrlas halyqtar arasyndaǵy rýhanı baılanys qarym-qatynasymyzdy nyǵaıtýda úlken ról atqarady», dedi Shentop.
Sonymen qatar taraptar Qazaqstan men Túrkııa arasyndaǵy saýda-ekonomıkalyq jáne mádenı-gýmanıtarlyq ózara is-qımyl máselelerin talqylady.
Bul rette túrik kásipkerleriniń qarjy, kólik jáne logıstıka salalaryn, aýyl sharýashylyǵy men týrızmdi damytýǵa arnalǵan ınvestısııalyq jobalarǵa qatysý múmkindigi sóz boldy. Nurlan Nyǵmatýlın Májilis depýtattary pysyqtap jatqan «О́nerkásiptik saıasat týraly» zań jobasy sheteldik ınvestorlarǵa, onyń ishinde túrik kompanııalaryna jańa múmkindik ashatynyn alǵa tartty.
Mustafa Shentop 28 qyrkúıekte Túrkistan qalasynda ótetin Túrkitildes memleketter Parlamenttik Assambleıasynyń X plenarlyq otyrysyna qatysady.