Nur-Sultanda ótip jatqan WTA 250 Astana Open týrnıriniń ekinshi kúni Qazaqstannyń úsh tennısshisi kortqa shyqty. Zarına Dıas pen Iýlııa Pýtınseva jeńiske jetip, jerigilikti kórermenderdi qýantsa, Anna Danılına tusaýkeser kezdesýinde utyldy, dep jazady Egemen.kz.
Álemdik reıtıngte 287-orynda turǵan 25 jastaǵy Anna Danılına tym myqty qarsylasqa tap boldy. Fransııalyq Krıstına Mladenovıch kezinde AQSh-tyń ashyq birinshiligi men Rolan Garrostyń shırek fınalynda óner kórsetti. Dáýiri júrip turǵan kezinde WTA tiziminde 10-orynǵa deıin kóterildi. Qazirgi kezde ol 62-satyǵa jaıǵasty. Áıgili sportshyǵa Danılına ájeptáýir qarsylyq kórsetti. Desekte 2 saǵat 53 mınýtke sozylǵan saıys 6:4, 6:7, 6:4 esebimen Mladenovıchtiń paıdasynan sheshildi.
Sońǵy kezderi eleýli tabysymen jankúıerlerdi qýanta almaı júrgen Zarına Dıas osy jarysta jasyndaı jarqyraıdy degen úmitimiz zor. Ázirge bastamasy jaman emes. Búgingi tańda 106-oryndy enshilep otyrǵan ol reıtıngte ózinen áldeqaıda tómen turǵan reseılik Anastasııa Zaharovaǵa shań qaptyryp ketti. 2 saǵat 53 mınýtqa sozylǵan shıelenisti básekede 7:6, 4:6, 7:5 esebimen aıaqtaldy. Endi qazaq tennısshisi shvesııalyq Rebekka Paterssonmen sheberlik baıqasady.
Álemniń 47 raketkasy Iýlııa Pýtınseva grýzııalyq Ekaterına Gorgodzemen kezdesti. 29 jastaǵy Qap taýy bókterinen kelgen burymdynyń baǵyndyrǵan pálendeı belesteri joq. Bul kúnderi ol úzdikter reıtınginde 162-orynǵa taban tireýde. Ortań qol oıynshyny utý Pýtınseva úshin aıtarlyqtaı qıyndyq týǵyzǵan joq – 6:1, 6:2. Endi Iýlııa belarýssııalyq Vera Lapkomen kezdesedi.
Týrnırdiń ekinshi kúni ótken ózge kezdesýlerde mynadaı nátıjeler tirkeldi: Anastasııa Potapova (Reseı) – Leslı Kerkhove (Nıderland) 7:5, 6:1; Rebekka Patersson (Shvesııa) – Stefanı Fegel (Shveısarııa) 5:7, 6:4, 6:3; Vera Lapko (Belarýs) – Iýle Nımaıer (Germanııa) 7:5, 4:6, 6:4; Jaklın Krıstıan (Rýmynııa) – Natalıa Vıhlıanseva 4:6, 7:5; Klara Bıýrel (Fransııa) – Mendı Mınella (Lıýksembýrg) 5:2 (Rt).