Chempıondarǵa – laıyqty qoshemet

Jylan jyly jetisýlyq sportshylar da Azııa, álem chempıonattarynda altynnan alqa taǵyp, dú­bir­li dodalarda Qazaqstannyń kók baıraǵyn jelbiretkeni málim. «Erim deıtin eli bolmasa, elim deıtin er qaıdan shyqsyn» demekshi, Almaty oblysynyń ákimi Ańsar Musahanov sport salasy boıynsha ótken jyl jetistikterin qorytyndylap,  sportshylarǵa laıyqty syı-qurmet kórsetti. Qazaqstan Respýblıkasynyń Prezıdenti Nursultan  Nazarbaev «Qazaqstan-2050» Strategııasynda «Deneshynyqtyrý men sport memlekettiń aıryqsha nazarynda bolýy tıis. Naq sol salamatty ómir salty ult densaýlyǵynyń kilti bolyp sanalady», dep  naqtylady. Osy tapsyrmany júzege asyrý maqsatynda  oblystyq bıýdjetten 4 mlrd. 860 mln. teńge bólinip, Jambyl aýdanyndaǵy  Aqqaınar aýylynda jańa sporttyq-saýyqtyrý kesheni  paıdalanýǵa berildi. Eńbekshiqazaq aýdany Shelek aýylyndaǵy sport mektebiniń qaıta jańǵyrtý jumystary aıaqtaldy. Taldyqorǵan qalasyndaǵy №1 olımpıadalyq rezervtegi mamandandyrylǵan balalar men jasóspirimder sport mektebiniń «Eńbek» sport zaly, Uıǵyr, Qaratal aýdandary sport mektepteri kúrdeli jóndeýden ótti. Búginde Taldyqorǵan qalasyndaǵy «Jetisý» stadıony men kógaldaǵy hokkeıge arnalǵan alańdarda jańǵyrtý jumystary júrgizilýde», deı kele, oblys ákimi bokstan Qazaqstan Respýblıkasynyń halyqaralyq dárejedegi sport sheberi, Azııa, álem chempıonatynda altyn medal jeńip alǵan  Jánibek Álimhanuly, grek-rım  kúresinen Qazaqstan Respýblıkasynyń halyqaralyq dárejedegi sport sheberi, Azııa chempıonatynda altyn medal, álem chempıonatynda qola medal jeńip alǵan  Nurmahan Tinálıev, aýyr atletıka boıynsha Qazaqstan Respýblıkasynyń eńbek sińirgen sport sheberi, álem chempıonatynyń qola júldegeri Vladımır Sedov, sýǵa júzýden Qazaqstan Respýblıkasynyń eńbek sińirgen sport sheberi, Azııa chempıonatynda altynnan alqa taqqan Vıtalıı Hýdıakov, qazaq kúresinen Qazaqstan Respýblıkasynyń sport sheberi, Azııa chempıony álem chempıonatynyń qola júldegeri Amangeldi Satybaldınov  syndy sport sańlaqtary men jattyqtyrýshylarynyń  jigerlerin janyp, patrıottyq turǵyda keleli áńgime órbitti. Kezdesý sońynan qalyptasqan dástúr boıynsha  sportshylar oblys ákimine  bylǵary dop jáne belbeýli kımono syılap, estelikke fotosýretke tústi. Nurbol Áldibaev, «Egemen Qazaqstan». Almaty oblysy.