Elimizde jyl basynan beri 800-den astam tabıǵat qorǵaý zańnamasyn buzýshylyq anyqtalǵan. Bul jóninde Ekologııa, geologııa jáne tabıǵı resýrstar mınıstrliginiń ókili Danııar Turǵambaev Prezıdent janyndaǵy Ortalyq kommýnıkasııalar qyzmetinde ótken brıfıngte habarlady.
Mınıstrliktiń Orman sharýashylyǵy jáne janýarlar dúnıesi komıteti tóraǵasynyń orynbasary Danııar Ǵalymulynyń aıtýynsha, jyl basynan beri komıtettiń aýmaqtyq bólimsheleriniń ınspektorlary men qoryqshylar 1700-den astam reıd uıymdastyryp, 441 tekserý júrgizgen.
«Osyndaı is-sharalardyń nátıjesinde tabıǵat qorǵaý zańyn buzýǵa qatysty 820 fakti anyqtalyp, 800-ge jýyq adam ákimshilik jaýapkershilikke tartyldy. Salynǵan ákimshilik aıyppul somasy 8 mln teńgeden asady. Al óndirilgen aıyppul kólemi 6 mln teńgeden astam», dedi spıker.
Brıfıngte brakonerlikpen kúres sharalary týraly keńinen maǵlumat bergen D.Turǵambaev aqbókenderdi qorǵaý máselesine erekshe toqtaldy. Onyń aıtýynsha, turaqty qorǵaýdyń arqasynda búginde aqbókenderdiń sany 842 myńǵa jetken.
«Janýarlardyń sırek kezdesetin jáne joıylyp bara jatqan túrlerin, onyń ishinde kıikterdi qorǵaýdy «Ohotzooprom» О́B» RMQK jalpy aýdany 123 mln ga bolatyn 12 oblystyń aýmaǵynda júzege asyryp keledi. Mekemede búginde 430 ınspektor jumys isteıdi. Olar júrip ótý múmkindigi joǵary 152 jol talǵamaıtyn kólikpen qamtamasyz etilgen», dedi ol.
2019 jyly qaıǵyly oqıǵa kezinde úsh ınspektordyń qaza tapqany esimizde. Osy oqıǵadan keıin Memleket basshysy brakonerlikpen kúres boıynsha túbegeıli ári keıinge qaldyrýǵa bolmaıtyn sharalardy qabyldaýdy tapsyrǵan bolatyn. Osyǵan oraı, ótken jyly qańtarda «Qazaqstan Respýblıkasynyń keıbir zańnamalyq aktilerine qylmystyq, qylmystyq is júrgizý zańnamasyn jetildirý jáne jeke adamnyń quqyqtaryn qorǵaýdy kúsheıtý máseleleri boıynsha ózgerister men tolyqtyrýlar engizý týraly» zań kúshine enip, jaza qataıtyldy. Máselen, qylmystyq teris qylyqtar qylmysqa aýystyrylyp, kináliler 10 jylǵa deıin bas bostandyǵynan aıyrylady.
Sonymen qatar brakonerlikti der kezinde anyqtaý jáne jolyn kesý maqsatynda jyl saıyn EGTRM, IIM men UQK-niń birlesken buıryǵymen kóktemgi jáne qysqy kezeńderde keń aýqymdy «Kıik» tabıǵat qorǵaý aksııasyn ótkizý jospary bekitilgen. Aksııa aıasynda el aýmaǵyndaǵy jabaıy faýnanyń basqa da túrlerin ótkizýge jáne satyp alýǵa mamandanǵan qylmystyq toptar áshkerelengen. Jyl basynan beri ınspektorlar kıik brakonerligine qatysty 56 faktini anyqtap, 4077 múıiz jáne 141 kıiktiń ushasyn tárkilegen. Alaıda D.Turǵambaevtyń aıtýynsha, qabyldanyp jatqan sharalarǵa, qylmystyq jaýapkershiliktiń qatańdaǵanyna qaramastan, elimizde brakonerlik tyıylmaı tur.
Brakonerlermen kúreste IIM-men birge arnaıy is-qımyl algorıtminiń ázirlengenin aıtqan spıker aldaǵy ýaqytta janýarlar dúnıesin qorǵaý, esepke alý jáne monıtorıng júrgizý kezinde pılotsyz ushý apparattary men GPS-trekerlerdiń qoldanylatynyn da málimdedi. Máselen, «Ohotzooprom» О́B RMQK materıaldyq-tehnıkalyq bazasyn jańartý kezinde ınspektorlardy beınetirkeý júıelerimen jaraqtandyrý, qoryqshylardy qorǵanysh keýdesheler, kisender, arnaıy rezeńke taıaqtar, kólikti toqtatýǵa arnalǵan qurylǵylarmen qamtamasyz etý de qolǵa alynǵan.