Kókshetaýda aýdandyq jáne qalalyq mádenıet jáne tilderdi damytý bólimderiniń basshylary men sol salaǵa jaýapty mamandardyń qatysýymen ádistemelik semınar ótti, dep habarlaıdy Egemen.kz oblystyq ishki saıasat basqarmasyna silteme jasap.
Jıynda Aqmola oblysynyń ulttyq toponımııasy týraly zertteýler barysynda anyqtalǵan bastapqy tarıhı-geografııalyq ataýlaryn qalpyna keltire otyryp, eldi mekenderdi qaıta ataý máseleleri talqylandy.
Semınardy ashqan oblystyq ishki saıasat basqarmasy basshysynyń orynbasary Gúlmıra Kárimova sońǵy 3 jylda osy salada atqarylǵan jumystardyń qorytyndylaryna toqtaldy.
«Bizdiń oblysta onomastıka salasynda birqatar jumystar júrgizilýde. 2018-2020 jyldary 1000-ǵa jýyq kóshe men 30-dan astam eldi meken ataýy ózgertildi, kóptegen nysandarǵa tanymal tulǵalardyń esimderi berildi», dep atap ótti Gúlmıra Kárimova.
Onyń aıtýynsha, Aqmola oblysynyń ishki saıasat basqarmasy eki jyl boıy zertteý jumystaryn júrgizýge qarajat bólip keledi.
L.Gýmılev atyndaǵy Eýrazııa Ulttyq ýnıversıtetiniń arheologııa jáne etnologııa fakýltetiniń professory Jambyl Artyqbaev jáne QR Ulttyq mýzeıiniń qyzmetkeri Irına Bekzatqyzynyń ǵylymı izdenisteriniń arqasynda 120-dan astam eldi mekenniń tarıhı ataýlary tabylyp, ol muraǵat qujattarymen rastalady.
Semınarda tilderdi damytý jáne onomastıka bóliminiń basshysy Aıgúl Talpaqova qatysýshylardyń nazaryn onomastıkalyq jumystardy uıymdastyrýda talaptardy saqtaý qajettigine aýdarsa, osy bólimniń bas mamany Ásem Jumaǵulova eldi mekender men onyń quramdas bólikteriniń ataýlaryn ózgertýge qatysty qujattardy resimdeý tártibine nazar aýdardy.
«Ataýyn ózgertý máselesi óte mańyzdy, ol sypaıylyq pen oılanýshylyqty talap etedi. Munda tek quqyqtyq salada áreket etý kerek, arnaıy normalar, erejeler bar, olar arqyly eldi mekenderdiń tarıhı ataýlaryn ózgertýge bolady», dedi ishki saıasat basqarmasy basshysynyń orynbasary.