QR Úkimetiniń janyndaǵy koronavırýsty taratpaý jónindegi vedomstvoaralyq komıssııa memlekettik shekaradan kirip-shyǵýdyń sharttaryn jeńildetti, dep habarlaıdy Egemen.kz.
Bul týraly QR Ulttyq qaýipsizdik komıteti Shekara qyzmeti habarlady.
«COVID-19 pandemııasyna baılanysty memlekettik shekarany kesip ótýdegi shekteýler jalǵasady. 2021 jyldyń 13 qazanynda Qazaqstan Úkimetiniń janyndaǵy koronavırýsty taratpaý jónindegi vedomstvoaralyq komıssııa karantın shekteýleri kezeńinde memlekettik shekarany kesip ótýdiń jańa tártibin bekitti. Bul qujatpen knb.gov.kz ınternet resýrsynyń jáne resmı kanaldardyń «Paıdaly siltemeler» bóliminen oqyp tanysýǵa bolady», deligen shekara qyzmetiniń Instagram paraqshasynda.
Jańa erejede el aýmaǵynan syrtqa shyǵýdyń tártibi jeńildetildi. Otbasy múshesiniń nemese jaqyn týysynyń qazasyna, qatty aýyryp jatqan týysqanyn kórýge shyqqan bolsa, Qazaqstan azamaty shekarany jubaıymen jáne kámeleketke tolmaǵan balasymen birge kesip óte alady.
Biraq bara jatqan týysqany men onyń arasynda erli-zaıyptylyq, ata-ana men bala, asyrap alǵan nemese asyrap alynǵan týysqandyq, tolyqqandy nemese jartylaı aǵaıyndylyq, ata-áje men nemere sııaqty týystyq qatynasy bolýy kerek.