GetEmotions – kez kelgen adamǵa kez kelgen taqyrypta suraq qoıyp, soǵan sáıkes pikir almasýǵa múmkindik beretin jasyryn áleýmettik jeli. Bul otandyq IT mamandarynyń tehnologııalyq ónimi.
Áleýmettik jelini oılap tapqan Aıtýǵan Omarovtyń aıtýynsha, joba eki máseleni sheshýge arnalǵan. Aıtalyq, adamdar kúndelikti alýan túrli jaǵdaıǵa tap bolyp, durys ári tıimdi sheshim taba almaı qınalyp jatady. Mine, osyǵan kelgende atalǵan platforma jeli qoldanýshylarynyń kóńilinen shyǵatyn keńester berýge qolǵabys etedi deıdi jobanyń avtory.
«Bizdiń áleýmettik jelide «Suraq-keńes» dep atalatyn arnaıy blok qarastyrylǵan. Munda ózińizge qyzyqty jáne tolǵandyratyn kez kelgen suraqty jasyryn túrde qoıyp, soǵan sáıkes jeli qoldanýshylarynan alýan túrli jaýaptar ala alasyz», dedi A.Omarov.
Joba avtorlary aıtqandaı, bul – tolyǵymen jasyryn áleýmettik jeli. Sol sebepti jeke basty kýálandyratyn málimetterdi qajet etpeıdi. Qoıylatyn saýaldardy kim qoıatyny da belgisiz kúıde qalady dep alǵa tartty avtorlar. Dese de suraqtardy platformanyń ákimgerleri kórýge haqyly. Eger de belgilengen talapqa saı kelmeıtin saýaldar bolsa, ol birden buǵattalady. Ruqsat berilgen suraqtar mázirdiń oń jaq buryshynda ornalastyrylady. Barlyq paıdalanýshy ony kórip, kez kelgen qoldanýshy oǵan jaýap jazyp, jasyryn chat júrgiziledi. Suraqqa orynsyz jaýap qaıtarylsa, qoldanýshy jaýap ıesin buǵattaı alady. Jeli qoldanýshysy joldaǵan saýalyn keri qaıtaryp alsa, onda osyǵan qatysty barlyq hat-habar da lezde joıylady.
A.Omarovtyń pikirine súıensek, qatysýshylardyń jeke derekterin jeli ákimgerleri de kórmeıdi. Olardyń quzyretine tek suraqtardy óńdep, ruqsat berý kiredi. Áleýmettik jeli jeke ınvestısııalar esebinen júzege asyrylypty.