Túrkistan oblysynyń Maqtaral aýdandyq polısııa bólimine Shardara aýdanynyń turǵyndary aryzdanyp, jas qyzǵa aldanyp qalǵanyn aıtqan. Kúdikti qyz býkmekerlik oıyn arqyly aqshany birneshe esege kóbeıtip beremin dep, olardan 8 mıllıon teńge alǵan, dep jazady Egemen.kz.
Aldanǵan turǵyndardyń sózinshe, jas qyz olarmen WhatsApp messendjeri arqyly habarlasyp, «utymdy usynys» aıtqan. Áıelder onyń bank kartasyna 1 mln teńge jibergen. Sodan keıin kúdiktiniń telefony óship, izim-ǵaıym joǵalǵan. Aldanǵanyn túsingen turǵyndar dereý polısııaǵa shaǵymdanypty.
Tártip saqshylary kúdiktini bank kartasynyń málimetteri boıynsha anyqtap, qolǵa túsirdi. Ol jergilikti turǵyn – jas qyz bolyp shyqty. Tergeý barysynda qyzdyń budan da basqa alaıaqtyq qylmystarǵa qatysy bary anyqtaldy. Ol «aqshańdy býkmekerlik oıyndar arqyly eselep kóbeıtip beremin» dep, turǵyndardan 50 000 – 800 000 teńge aralyǵynda alyp otyrǵan. Keltirilgen barlyq shyǵynnyń kólemi ázirge 8 mln teńgeni qurady.