QR Premer-mınıstri Asqar Mamın eldegi jumyssyzdyqqa qarsy kúreske qatysty birqatar tapsyrma berdi, dep habarlaıdy Egemen.kz.
«Eńbek mınıstrligi salalyq memlekettik organdarmen, óńirlerdiń ákimdikterimen birlesip, bir aı merzimde ekonomıkanyń sapaly jáne turaqty ósýin qamtamasyz etý úshin kadrlarǵa qajettilikti aıqyndaý máselesin ózektilendirsin», dedi Asqar Mamın Úkimet otyrysynda.
Onyń aıtýynsha, sıfrlandyrý jumyspen qamtýdyń múldem jańa túrlerin qurýǵa alyp keledi. Osyǵan baılanysty Úkimet basshysy atap ótkendeı, jumyspen qamtýdyń jańa túrlerin retteý jáne ekonomıkalyq belsendilikke tartý tetigin ázirleýdi jedeldetý qajet.
«Biliktilikti retteý - eńbek naryǵynyń básekege qabilettiligin arttyratyn júıeli qadam. Osyǵan baılanysty Eńbek mınıstrligi salalyq memlekettik organdarmen, «Atameken» UKP-men, kásipodaqtarmen, sarapshylar qaýymdastyǵymen birlesip, «Kásibı biliktilik týraly» Zań jobasyn ázirleýdi jáne talqylaýdy jedeldetýdi tapsyrdy.
Sonymen qatar, Batys Qazaqstan jáne Qyzylorda oblystarynyń ákimdikterine qysqa merzimde mıkroqarjy uıymdarynyń jarǵylyq kapıtalyn tolyqtyrýdy qamtamasyz etý tapsyryldy.
«Eńbek mınıstrligi «Atameken» UKP-men jáne óńirlerdiń ákimdikterimen birlesip, kásipkerlik jónindegi ulttyq joba sheńberinde «Bastaý bıznes» jobasyn iske asyrýdy jalǵastyrsyn. Qoldanystaǵy kásipkerlik jónindegi jobalyq keńse aıasynda mınıstr Serik Shápkenovtyń tóraǵalyǵymen jumyspen qamtý baǵytyn qurý qajet», dep túıindedi Asqar Mamın.