Shyǵys Qazaqstan oblysy Shemonaıha qalasynda turatyn Reseı azamaty 4 jyl boıy Qazaqstannan zeınetaqy alyp kelgen dep habarlaıdy Egemen.kz.
ShQO Polısııa departamentiniń Kóshi-qon qyzmetkerleri qos azamattyǵy bar adamdardy anyqtaý úshin oblys aýmaǵynda kúndelikti jumys júrgizýde.
«Qos azamattyqpen júrýdiń sebepteriniń biri – bul karantındik shekteýler kezeńinde memlekettik shekarany kedergisiz kesip ótý, tótenshe jaǵdaılar týyndaǵan kezde shuǵyl emıgrasııa múmkindigi, jappaı tártipsizdikter, qylmystyq qýdalaý, epıdemıologııalyq jaǵdaıdyń nasharlaýy, materıaldyq artyqshylyqtar alý, atap aıtqanda zeınetaqy esebi, balalardyń týýy kezindegi járdemaqy, joǵary oqý oryndaryna túsý kezinde jeńildik sharttary bolyp otyr.
Jyl basynan beri 800-den astam adamdy Qazaqstan azamattyǵynan aıyrý tirkeldi. Negizgi bóligi – Reseı Federasııasynyń azamattyǵyn qabyldaǵan tulǵalar», dedi ShQO PD bastyǵy Saǵat Madıev. ⠀
Sonymen qatar, qos azamattyq úshin 85 adam ákimshilik jaýapkershilikke tartyldy, onyń ishinde sheteldik azamattyqty alý faktisi týraly belgilengen merzimde habarlamaǵany úshin – 24, Qazaqstan Respýblıkasynyń pasporty men jeke kýáligin paıdalanǵany úshin – 61.
Qos azamattyqtyń taǵy bir jaǵdaıyn Shemonaıha aýdanynyń Kóshi-qon qyzmetiniń qyzmetkerleri anyqtady. Tártip saqshylary 2013 jyly Saratov oblysynda Reseı Federasııasynyń azamattyǵyn alǵan 63 jastaǵy qala turǵynyn anyqtady. Ol Qazaqstanda turyp, QR azamattarynyń qujattaryn paıdalanǵan. Reseı azamaty Qazaqstannan zeınetaqy alǵany jáne osy kúnge deıin memlekettik qyzmetterdi paıdalanǵany anyqtalyp otyr.
«Qazaqstan Respýblıkasy azamattarynyń jeke basyn kýálandyratyn qujattary alynyp, azamattyǵynan aıyrylǵany tirkeldi. Quqyq buzýshy QR ÁQBtK- niń 496-baby boıynsha 100 AEK kóleminde aıyppul túrinde ákimshilik jaýapkershilikke tartyldy», dedi Saǵat Madıev.
Aıta keteıik, Qazaqstanda qos azamattyq alýǵa tyıym salynǵan.