Taıaýda jarııalanǵan ǵalamdyq mobıldi ınternet jyldamdyǵy boıynsha reıtıngte Qazaqstan 21 satyǵa joǵarylap, 80-orynǵa taban tiregen. Bylaı qarasańyz, 21 pozısııaǵa kóterilý – táp-táýir progress, biraq 80-oryn degenińiz – asa qýanyp aıtarlyqtaı nátıje de emes.
Finprom-nyń jazýynsha, jyl basynan beri eldegi mobıldi ınternet jyldamdyǵy 63 paıyzǵa jaqsarǵan. Ortalyq Azııa elderi arasynda Qazaqstannyń kórsetkishi joǵary. Qyrǵyzstan – 103, О́zbekstan – 120, Tájikstan 129-oryn alǵan. Kórshiles Reseı 90-oryn alsa, Belarýs – 119-orynda. Reıtıng lıderleri – BAÁ, Ońtústik Koreıa, Norvegııa, Qatar jáne Qytaı.
«Qazaqstanda mobıldi ınternet jyldamdyǵyn sapaly jáne qoljetimdi etý boıynsha mańyzdy sharalar qabyldanyp jatyr. Mysaly, bıyl 9 aıda baılanys salasyna jiberilgen ınvestısııa 17,8 paıyzǵa ósip, 88,8 mlrd teńgeni quraǵan. Sońǵy bes jylda kúrdeli jóndeýden ótkizý úshin jumsalǵan qarjy jyl saıyn 19 paıyzǵa ósip keledi. Sonymen qatar mobıldi baılanystyń besinshi býyny 5G-di engizý jumystary jalǵasyp jatyr. 2019 jyly mobıldi operatorlar jańa jelini testileýden ótkize bastady» dep jazady Finprom.
Bıyl qyrkúıekte sıfrlyq damý mınıstri Baǵdat Mýsın Úkimet janyndaǵy radıojıilik jónindegi vedomstvoaralyq komıssııanyń 5G standartyn Nur-Sultan, Almaty jáne Shymkent qalalarynda synaqtan ótkizý týraly sheshim qabyldaǵanyn aıtqan edi. Grafık boıynsha testileýdi «Kazaqtelekom», «Ksell», «Kar-Tel», «Mobaıl Telekom-Servıs» operatorlary júrgizedi. Infraqurylymdy jetildirý jáne ınternet sapasyn jaqsartý jaýapkershiligi osy operatorlardyń moınyna júktelgen. Birinshi jarty jyldyqta Kcell mobıldi baılanys operatorynyń kapıtaldyq shyǵyny 4,7 mlrd teńgeni qurap, byltyrmen salystyrǵanda 28,3 paıyzǵa ósim kórsetken.
Ulttyq statıstıka bıýrosynyń dereginshe, mobıldi baılanys salasyna jiberilgen ınvestısııalarǵa negizinen eski qurylǵylar aýystyrylyp, abonentter sanyn kóbeıtý boıynsha óndiris qýattylyǵyn keńeıtý jumystary atqarylǵan. Sondaı-aq qarjy jańa tehnologııalardy engizýge de jumsalǵan.
Birinshi jartyjyldyq nátıjesi boıynsha elde 24,2 mln abonent bar. Bul byltyrdan 1,2 paıyzǵa kóp. Mobıldi baılanys operatorlarynyń ishinde Kcell, kompanııasynyń abonenti kóp. Abonentiniń kóptigimen Beeline jáne Tele2/Altel operatorlary da maqtana alady. Boljam boıynsha 2025 jylǵa deıin mobıldi ınternet paıdalanýshylary 54 paıyzǵa artpaq. Ol kezde 3G jelisi jalpy naryqtyń 28 paıyzyn ǵana ıelense, 4G 60 paıyzyn qamtıdy, al 5G jańa jelisi naryqtyń 12 paıyzyn ıelenbek.
Alaıda jaqynda ótken Digital Bridge halyqaralyq tehnologııalyq forýmynda sóz sóılegen Prezıdent Qasym-Jomart Toqaev eldegi ınternet sapasy men jyldamdyǵyna qatysty renish bildirip, Úkimetke osyǵan oraı zańdyq turǵyda sanksııa jáne ákimshilik quramdy reglamentteý boıynsha tapsyrma berdi.
«Qazirgi kezde naqty emes nárseni satý qalypty jaǵdaıǵa aınaldy. Olar ınternet parametrleriniń birin jarnamalaıdy da, shyn máninde múlde basqasyn usynady. Jaqsaryp jatqan eshteńe joq. Maǵan berilgen málimet boıynsha, tipti elordanyń ózinde, sóz ben istiń alshaqtyǵy 40-50 paıyzǵa deıin jetedi. Bul, shyn máninde, tutynýshylardy aldaý degen sóz. Mundaı óreskeldikti doǵarý kerek. Úkimetke ákimshilik quramdy zańdyq negizde bekitýdi jáne mundaı zań buzýshylyqtar úshin sanksııalar belgileýdi tapsyramyn. Biz únemi Qazaqstannyń aýmaǵy 100 paıyzǵa jýyq ınternetpen qamtyldy dep aıtyp júrmiz. Kánekı, máseleniń basyn ashyp alaıyq, osy is júzinde rastalǵan aqparat pa álde joq pa? Nemese oıymyzdaǵyny shyndyq dep sanaımyz ba?» dep qatań synǵa alǵan edi.
Qazir Qazaqstanda 2 myńǵa jýyq aýyl ınternetpen qamtylmaǵan. Tıisti mınıstrliktiń deregi boıynsha sonyń ishinde 617 aýylǵa ınternet tartý múlde múmkin bolmaı tur.