Qostanaı jáne Aqmola oblystarynda Mamandandyrylǵan halyqqa qyzmet kórsetý ortalyqtarynyń qyzmetkerleri jol qozǵalysy erejeleriniń teorııalyq emtıhandaryn zańsyz ótkizgen, dep habarlaıdy Egemen.kz QR Sybaılas jemqorlyqqa qarsy is-qımyl agentiginiń baspasóz qyzmetine silteme jasap.
«Júrgizýshi kýáliginen úmitti azamattardyń ornyna emtıhandy arnaıy daıyndalǵan tulǵalar tapsyryp otyrǵan. Mysaly, Aqmola oblysynda arnaıy daıyndalǵan adamdar emtıhan kompıýterlerine qashyqtan qol jetkizip, bógde azamttardyń atynan jaýap berip otyrǵan. Al Qostanaı oblysynda arnaıy daıyndalǵan adamdar medısınalyq maska men bas kıimniń kómegimen bet álpetin tumshalaý arqyly emtıhanǵa ózge azamattardyń ornyna kirgen. Tergeý barysynda 1 myńnan astam júrgizýshi kýáligin zańsyz berý faktileri tekserilip, emtıhannan sátti ótkeni týraly berilgen jalǵan anyqtamalar qaıtaryldy», dep jazdy agenttiktiń baspasóz qyzmeti.
Agenttik ókilderiniń aıtýynsha, osyndaı jalǵan qujat arqyly júrgizýshi kýáligin alǵan qostanaılyq azamat naýryz aıynda jol erejesin óreskel buzyp, «Toyota Samrý» avtokóligimen soqtyǵysqan.
«Tergeý málimeti boıynsha, apatqa kináli turǵyn teorııalyq jáne praktıkalyq emtıhan tapsyrmaı-aq júrgizýshi kýáligin alǵan. Al bul joly anyqtalǵan zańsyzdyqtarǵa baılanysty eldegi mamandandyrylǵan HQKO-nyń bárinde tekserý júrgiziletin bolady», delingen resmı málimette.