Senator Aqmaral Álnazarova Úkimetke joldaǵan depýtattyq saýalynda transplantologııa salasyndaǵy máselelerge toqtaldy, dep habarlaıdy Egemen.kz.
Senatordyń aıtýynsha, múshe transplantasııasyna kezek óte baıaý ári operasııany kútetin naýqastardyń sany kúnnen-kúnge artyp keledi.
Aqmaral Álnazarova Qazaqstanda 2012 jyldan bastap dene múshelerin transplantasııalaý boıynsha 2 myńǵa jýyq operasııa jasalǵanyn aıtty. Búgingi tańda transplantasııany kútý tiziminde 3 300-den astam adam bar, onyń 105-i bala.
Sońǵy 9 jylda elimizde balalarǵa 118 búırek transplantasııasy jasaldy, onyń 77%-y donor týystardan alynǵan. Senator transplantologııalyq qyzmetti tolyqqandy qalyptastyrý úshin jaǵdaı jasaý, sondaı-aq halyqtyń organ donorlyǵy týraly habardarlyǵyn arttyrý boıynsha jumys júrgizý qajettigin atap ótti.
«Sonymen qatar elimizde transplantologııanyń damýyn tejeıtin negizgi sebepterge qoldanystaǵy normatıvtik-quqyqtyq bazanyń jetilmegendigi, donorlyq stasıonarlardyń materıaldyq-tehnıkalyq bazasynyń tómendigi, sondaı-aq medısına qyzmetkerleriniń quqyqtyq turǵyda qorǵalmaǵany jatady», dedi Aqmaral Álnazarova Senat otyrysynda.
Senator óz sózinde donorlyq organdar men transplantasııa brıgadalaryn óńirlerden ortalyqqa ýaqtyly jáne qaýipsiz jetkizýdiń tehnıkalyq qıyndyqtary bar ekenin atap ótti.