Ulttyq qoǵamdyq senim keńesiniń (budan ári – UQSK, Ulttyq keńes) aıasynda sarapshylar Qazaqstan óńirlerinde aýyl ákimderiniń tikeleı saılaýyn ótkizý barysyn talqylady. Is-sharaǵa UQSK músheleri, Parlament Májilisiniń depýtattary, belgili qazaqstandyq saıasattanýshylar men áleýmettanýshylar qatysty.
Sharany Qazaqstan Prezıdentiniń kómekshisi, Ulttyq keńes hatshysy Erlan Karın ashty. Ol óz sózinde «Reformalar men dıalog prezıdenttik kýrstyń negizgi baǵyttarynyń biri bolyp tabylady. Máselen, saıası bastamalardy júzege asyrý aıasynda ǵana qazirgi tańda 10 zań qabyldandy. Olardyń ishinde bıylǵy mamyr aıynda Memleket basshysy «Qazaqstan Respýblıkasyndaǵy saılaý týraly» Konstıtýsııalyq zańǵa ózgerister men tolyqtyrýlar engizý týraly» Konstıtýsııalyq zańǵa jáne «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zańǵa qol qoıdy. Sonyń nátıjesinde bıylǵy jyldyń ekinshi jartyjyldyǵynan bastap respýblıka boıynsha 811 aýyldyq okrýgte ákimderdiń saılaýy ótti. Saılanǵan ákimderdiń 86% saıası partııalardyń úmitkerleri. Taǵy 14% ózin ózi usynǵan úmitkerler. Sonymen birge, saılanǵan ákimderdiń jartysy (51%) saılaýǵa deıin bul qyzmetterdi atqarmaǵan jańa adamdar», dedi.
UQSK jáne Prezıdenttik jastar kadrlyq rezerviniń birlesken zertteý tobynyń jetekshisi Aleksandr Danılov 4 oblystyń (Pavlodar, Qostanaı, Túrkistan jáne Shyǵys Qazaqstan) aýyl ákimderiniń saılaýy ótken aýyldyq okrýgterine barý negizinde daıyndalǵan taldamalyq baıandamany usyndy. Baıandamada aýyldaǵy turǵyndardyń negizgi túıtkildi máseleleri, aýyl ákimderin tikeleı saılaýdyń qysqasha qorytyndylary jáne saılaý naýqanynyń erekshelikteri kórsetilgen.
Aleksandr Danılov óz sózinde aýyldyq okrýg ákimin tikeleı saılaýyna baılanysty aýyl turǵyndarynyń jalpy pikiri jaqsy ekenine nazar aýdardy. Zertteý barysynda úmitkerlermen júrgizilgen suhbattar nátıjesi saıası partııalar jumysynyń jandanǵanyn, sondaı-aq úmitkerler ýájdemeleriniń jetkilikti joǵary deńgeıin, saılaý naýqany mehanızmderi men taktıkasyn jaqsy túsingenderin kórsetti.
Sonymen birge, budan buryn Mańǵystaý, Soltústik Qazaqstan jáne Qaraǵandy oblystarynda UQSK músheleriniń kóshpeli otyrystary aıasynda aýyl ákimderiniń tikeleı saılaýyna daıyndyq barysy men aýyldardy damytý máseleleri talqylanǵan bolatyn. Murat Ábenov, Tóleýtaı Raqymbekov, Marat Bashımov jáne Maksım Rojın óńirlerge barǵan saparlaryna qatysty óz oılarymen bólisti.
Sondaı-aq óńirlerden kelgen UQSK músheleri Lázzat Qojahmetova, Bórihan Nurmuhamedov, Tattygúl Talaeva, Ýaıs Ersaıynuly jáne Aıgúl Orynbek jergilikti jerlerde aýyl ákimderin saılaýdyń erekshelikterine toqtaldy.
Talqylaý qorytyndysy boıynsha sarapshylar aýyl ákimderin tikeleı saılaý tetigin jetildirý boıynsha birqatar usynys berdi. Ulttyq qoǵamdyq senim keńesiniń aldaǵy altynshy otyrysynda da aýyl ákimderi saılaýyn ótkizý boıynsha usynystar toptamasy usynylatyn bolady.