Máskeýde TMD-ǵa qatysýshy memleketterdiń Qorǵanys mınıstrleri keńesiniń otyrysy ótti. Oǵan QR Qorǵanys mınıstri, general-leıtenant Murat Bektanov bastaǵan qazaqstandyq áskerı delegasııa qatysty, dep habarlaıdy Egemen.kz mınıstrliktiń baspasóz qyzmetine silteme jasap.
Otyrys barysynda áskerı-saıası jaǵdaı jáne onyń Dostastyq elderiniń qaýipsizdigine áseri, áskerı bilim berý, kadrlar daıarlaý, gýmanıtarlyq mınasyzdandyrý, áýe qorǵanysynyń birikken júıesi men onyń áýe-ǵaryshtyq qorǵanys mindetterin sheshýge beıimdelýi máseleleri qaraldy.
Dostastyq memleketteriniń qorǵanys mınıstrleri 2021 jylǵy Armııa halyqaralyq oıyndarynyń qorytyndylary týraly baıandamalardy tyńdap, áskerı qyzmetshilerdiń áskerı-kásibı sheberligin arttyrý týraly pikir almasty. Otyrysqa qatysýshylar koronavırýstyń taralýyna qarsy kúreste radıasııalyq, hımııalyq jáne bıologııalyq qorǵaý áskerlerin qoldaný tájirıbesin talqylady.
Taraptar TMD-ǵa qatysýshy memleketter Qorǵanys mınıstrleri keńesiniń aldaǵy jylǵa arnalǵan jumys josparyn jáne kezekti otyrystyń aldyn ala kún tártibin talqylady.