Ábý-Dabı qalasynda Shyǵys jekpe-jegi – djıý-djıtsýden ótken álem chempıonatynda Qaraǵandy qalasynan baryp baq synaǵan Álı Aqsuńqar tamasha óner kórsetip, dúnıejúzilik dodanyń jeńimpazy atandy, dep jazady Egemen.kz.
Balǵyn chempıon kenshiler astanasyndaǵy №101 mektep-gımnazııanyń 6-synybynda oqıdy. Jasy 11-ge bıyl tolǵan óren sporttyń bul túrimen úsh jyldan beri aınalysady eken.
Álem chempıony Álı qazaqtyń belgili aqyny, Abaı atyndaǵy Memlekettik syılyqtyń laýreaty Serik Aqsuńqarulynyń Raýan esimdi ulynan týǵan nemeresi. Atasy nemeresiniń aıtqandy eki etpeıtin elgezek ekenin, sabaqqa da, sportqa da ýaqyt taýyp, birdeı úlgerip júretinin aıtady.
«Álı budan buryn da birtalaı jarystarǵa qatysyp, júlde alyp júrdi. Ol jekpe-jekke shyqqanda, úıde taqymdy qysyp, shyqpa janym shyqpamen otyramyz. Nemerem jarysta namysshyl, al ómirdiń ózinde meıirimdi bolyp ósip keledi», deıdi ájesi Ǵalııa Berdibaı.
Qazirgi ýaqytta Álı Aqsuńqar bilikti bapkerler Oljas Nurtahanov pen Aıbar Orazalynyń qaramaǵynda jattyǵady. Bolashaqta ol eresekter arasyndaǵy álem chempıonatynda óner kórsetip, jeńis tuǵyrynyń eń bıik satysynda turyp elimizdiń Ánuranyn shyrqatýdy armandaıdy.