QR Premer-Mınıstri Asqar Mamın RF Úkimeti tóraǵasynyń orynbasarlary Aleksandr Novak pen Alekseı Overchýk bastaǵan delegasııany qabyldady, dep habarlaıdy Egemen.kz.
Taraptar otyn-energetıka sektoryndaǵy — jer qoınaýyn paıdalaný, munaı jáne gaz, elektr energetıkasy salalaryndaǵy yntymaqtastyqtyń ózekti máselelerin talqylady.
Sýtegi energetıkasy salasyndaǵy yntymaqtastyq perspektıvalaryna, Qazaqstannyń soltústik jáne shyǵys óńirlerin gazdandyrýǵa reseılik kompanııalardyń qatysýy máselesine erekshe nazar aýdaryldy.
Reseıden Qazaqstanǵa dızel otynyn jetkizý, Reseı kómirsýtekteriniń QR aýmaǵy arqyly tasymaldanýy jáne t.b. máseleler qaraldy. Munaı-gaz hımııasy salasynda — polıpropılen, polıetılen, býtadıen jáne onyń týyndylaryn óndirý boıynsha birlesken jobalardy iske asyrý barysy talqylandy.
«Samuryq-Qazyna» AQ men «QazMunaıGaz» UK» AQ «SIBÝR Holdıng» JAQ-pen birlesip, Atyraý qalasyndaǵy ıntegrasııalanǵan gaz-hımııa kesheniniń bazasynda 2022 jyldyń basynda jylyna 500 myń tonna polıpropılen óndiretin birlesken kásiporyn ashýdy josparlaýda. Taraptar jylyna 1,25 mln tonna polıetılen óndiretin zaýyt qurylysynyń birlesken jobasyn iske asyrý máselesin qarastyryp jatyr.
«QazMunaıGaz» UK» AQ «Tatneft» JAQ-pen birlesip, bıtým modıfıkasııasynda qoldanylatyn býtadıen kaýchýkterin óndirý, adgezıvter, jelimder, rezeńkeler jáne ekologııalyq taza shınalar daıyndaý boıynsha birlesken jobany iske asyrýda. Jobany iske asyrý merzimi – 2021-2025 jyldar, óndiris qýaty – jylyna 186 myń tonna býtadıen kaýchýkteri men 170 myń tonna ızobýtan.
Taraptar ekijaqty jáne kópjaqty formattaǵy strategııalyq ózara is-qımyldyń barlyq baǵyttary boıynsha odan ári syndarly kelissózder júrgizýge ázirligin rastady.
Kezdesýge QR Premer-Mınıstriniń orynbasary Roman Sklıar, «Samuryq-Qazyna» AQ basqarma tóraǵasy Almasadam Sátqalıev, energetıka mınıstri Maǵzum Myrzaǵalıev, «QazMunaıGaz» UK» AQ basqarma tóraǵasy Alık Aıdarbaev, «QazTransGaz» AQ bas dırektory Qaırat Sháripbaev, «Qazatomónerkásip» UAK» AQ basqarma tóraǵasy Májıt Sháripov qatysty.