Keshe Nur-Sultanda «Pandemııadan keıingi jańa álemge kózqaras» taqyrybyna arnalǵan «Astana klýbynyń» altynshy otyrysy ashyldy. Álemniń eń myqty 50-den astam spıkeri, memleketter men úkimetterdiń burynǵy basshylary, saraptama ortalyqtary men halyqaralyq uıymdardyń basshylary, álemdik BAQ ókilderi qatysatyn otyrys aıasynda ózekti máseleler talqylanbaq.
Naqtylaı aıtqanda, sarapshylar halyqaralyq dıalog alańynda úsh kún boıy (15-17 qarasha) jahandyq ekonomıkanyń mańyzdy máselelerin, geosaıasat pen halyqaralyq qatynastardy, klımattyń ózgerýi jáne t.b. túıtkilderdi talqylaıdy.
«Astana klýbynyń» jumysy barysynda Qazaqstannyń 30 jyldaǵy damý qarqynyna, onyń ishki jáne syrtqy saıasatyn qalyptastyrýdaǵy Tuńǵysh Prezıdent Nursultan Nazarbaevtyń róline jete nazar aýdarylmaq. Oǵan qosa, jańa geosaıası jaǵdaıda aımaqtyń damý perspektıvalaryn talqylaý josparlanǵan.
2019 jyly Elbasynyń bastamasymen qurylǵan «Tún ortasy bolǵanda: Iаdrolyq dıalog boıynsha áreket etý ýaqyty» taqyrybyndaǵy Jahandyq kóshbasshylar alıansynyń otyrysynda ıadrolyq qaýipsizdik máseleleri de osy «Astana klýbynyń» kezekti otyrysynyń jumysynda talqylanbaq. Qazirgi ýaqytta Kóshbasshylardyń jahandyq Alıansy 70-ten astam kórnekti halyqaralyq qaıratkerdi, saıasatker men sarapshyny jáne Nobel syılyǵynyń laýreatyn bir arnaǵa toǵystyryp otyr.
Iv Leterm – Belgııanyń Premer-mınıstri (2008, 2009-2011), Nıno Býrdjanadze – «Birtutas Grýzııa – Demokratııalyq qozǵalys» partııasynyń tóraıymy, Grýzııa Prezıdentiniń mindetin atqarýshy (2003-2004, 2007-2008), Grýzııa parlamentiniń tóraǵasy (2001-2008), Danılo Túrk – Madrıd klýbynyń Prezıdenti, Slovenııa Prezıdenti (2007-2012), Abdýlla Gúl – Túrkııa Prezıdenti (2007-2014 jj.), Djonatan Granoff – Jahandyq qaýipsizdik ınstıtýtynyń prezıdenti (AQSh), Vladıslav Inozemsev – Postındýstrıaldy qoǵamdy zertteý ortalyǵynyń dırektory (Reseı), Djeıms Lındseı – Halyqaralyq baılanystar keńesiniń (CFR) aǵa vıse-prezıdenti jáne kóptegen basqa da tulǵa osy jáne ózge baǵyttar jaıly pikirlerin ortaǵa salady.
Dıalog alańy sessııasynyń ashylý saltanatynda sóz sóılegen Nursultan Nazarbaev qorynyń dırektory, Parlament Májilisiniń depýtaty Darıǵa Nazarbaeva: «Bizdiń klýbtyń burynǵy otyrysy 2019 jyly ótken. Ol otyrys múldem basqa dáýirde bolǵan sekildi. Sodan keıin jer-jerde vırýstyń órshýi ádettegi ómir tártibin ózgertip jiberdi. Ekonomıkalar toqtap, álemniń kóptegen elinde oqshaýlaný jaǵdaıy týdy. Vırýs álemdi dál bulaı ózgertedi dep eshkim kútpegen edi. Pandemııa bizdiń qanshalyqty ózara tyǵyz baılanysty jáne bir-birimizge táýeldi ekenimizdi taǵy bir ret dáleldedi. Búginde halyqaralyq qaýymdastyq burynǵydan da birigip áreket etýge muqtaj», dedi. Sondaı-aq ol «ózara senimdilik rejimin qalpyna keltirý – qazirgi ýaqytta halyqaralyq arenada jasalýǵa tıis jáne osy maqsatta jan-jaqty kómek kórsetý qajet. Bul – «Astana klýbynyń» basty mıssııasy» ekendigin atap ótti.
Nursultan Nazarbaev qory dırektorynyń aıtýynsha, indet álemdik júıede burynnan beri jalǵasyp kele jatqan túbegeıli ózgeristerge muryndyq bol- dy.
«Álemde bul ózgerister qaı baǵytta bolýy kerek degen túsinik joq. Bizge búginde Úlken Eýrazııadaǵy dıalogti keshendi túrde qaıta bastaý kerek ekeni aıdan anyq», dedi Darıǵa Nazarbaeva.
Onyń pikirin Thinking the Unthinkable jobasynyń negizin qalaýshy jáne onyń dırektory, London Kıngs kolledjiniń professory, BBC World News jańalyqtar baǵdarlamasynyń júrgizýshisi (1996-2014) Nık Goýıng qoldady. «Álemde COVID-19-ǵa baılanysty mundaı jaǵdaı bolaryn eshkim elestete almady. Birikken Ulttar Uıymynyń Bas hatshysy sóz etkendeı, bizdiń názik planetamyzǵa qaýip tónip tur. Bizge ortaq kózqaras boıynsha birigý qajet. Ekonomıkadaǵy jáne qoǵamdaǵy turaqsyzdyq, bolyp jatqan klımattyq ózgerister jáne t.b. saldarynan tereń qaıshylyqtar týyndady. Ǵylym eshteńeni boljaı almaıdy. Elder arasyndaǵy dıalog pen ózara is-qımyldy kúsheıtý qajet ekeni anyq», dedi sarapshy.
Osy oraıda, «Eýrazııa tańy» kitabynyń avtory, Flint Global-dyń bas keńesshisi, Portýgalııanyń Eýropa isteri jónindegi Memlekettik hatshysy (2013- 2015 j.j.) Brýno Masaesh qazirgi zamannyń basty syn-qaterlerin atady jáne memleketterdi syn-qaterlerdi birge jeńýge shaqyrdy. «Biz bıliktiń qaıta bólinýin, qalyptasqan álemdik tártiptiń erozııasyn, Eýropa men AQSh ekonomıkasynyń daǵdarysyn kórip otyrmyz. Pandemııa bul tendensııalardy tek ýshyqtyrdy. Biz aıaq astynan senim men qaýipsizdiktiń óte mańyzdy ekenin túsindik. Pandemııa bizge sabaq boldy. Odan alǵan sabaǵymyz tipti biz bilmeıtin qaterlermen kúresý úshin qajet. Osy múdde bizdi biriktirýi tıis. Bul turǵydan Qazaqstan – osyndaı ymyraǵa kelýdi, jaqsy baılanysta bolýdyń kórsetkishi. Táýelsizdik jyldarynda Qazaqstan eldermen ashyq qarym-qatynas ornatyp, Eýrazııany ártúrli qyrynan zerttep, jaǵdaıǵa ártúrli kózqaraspen qarady», dedi Brýno Masaesh.
Esterińizge sala keteıik, «Astana klýbynyń» jumysyna 2015 jyldan beri álemniń 40 elinen 200-den astam spıker qatysty.