Italııanyń qarjy gvardııasy zańsyz kóshi-qon, jezókshelikpen aınalysqan nıgerııalyq qylmystyq toptyń quramyna kiretin 40 adamdy qamaýǵa aldy, dep habarlaıdy Egemen.kz.
Iri operasııaǵa Kalıarı qalasyndaǵy qarjy gvardııasy basqarmasynyń 600-ge jýyq qyzmetkeri qatysqan. Habarlanǵandaı, qamaýǵa alý jáne tintý Italııanyń birneshe aımaǵynda ótkizilgen.
«Aqshany jymqyrýmen, zańsyz kóshi-qonǵa járdemdesýmen, adam saýdasymen, quldyqpen jáne adamdardy jezókshelik maqsatta paıdalanýmen aınalysatyn nıgerııalyq qylmystyq uıym joıyldy», delingen qarjy gvardııasy taratqan habarlamada.
Tutqyndalǵan adamdardan bólek, tergeýde «keń jeliniń» kóptegen qatysýshylary bar. Olar halyqaralyq deńgeıde jeke bas bostandyǵyna qarsy qylmystardyń iske asýyna septesken. Bul aıyptaý kezinde jazany aýyrlatatyn faktorǵa aınalady.
Operasııanyń máni týraly Rımdegi arnaıy baspasóz máslıhatynda egjeı-tegjeı aıtylmaq. Oǵan uıymdasqan qylmys jáne terrorızm isteri jónindegi ulttyq prokýror Federıko Kafıero de Rao qatyspaq.