QR Parlamenti Májilisiniń depýtattary zattar men materıaldardyń quramy men qasıetteriniń standartty úlgilerin jasaý jáne qoldaný jónindegi yntymaqtastyq týraly kelisimniń ratıfıkasııasyn maquldady, dep habarlaıdy Egemen.kz.
QR saýda jáne ıntegrasııa mınıstri Baqyt Sultanov palatanyń jalpy otyrysynda «Zattar men materıaldardyń quramy men qasıetteriniń standartty úlgilerin jasaý jáne qoldaný jónindegi yntymaqtastyq týraly kelisimdi ratıfıkasııalaý týraly» zań jobasyn usyna otyryp, osy kelisimdi ratıfıkasııalaý kelisimge qatysýshy elderde synaqtar boıynsha qosymsha rásimderdi ótkizbeı, Qazaqstanda ázirlengen standartty úlgilerdi tanýǵa múmkindik beretinin atap ótti.
«Mysaly, Qazaqstan Respýblıkasy standartty úlgi shyǵarady, synaqtar júrgizedi jáne tıpin bekitedi, al kelisimge qatysýshy qalǵan elder tehnıkalyq qujattamany saraptaý nátıjelerin qosymsha synaqtar júrgizbesten tanıdy», dep túsindirdi Baqyt Sultanov.
Vedomstvonyń málimetinshe, QR-da standartty úlgilerdi óndirý boıynsha barlyǵy 16 uıym bar, olar «Qazstandart» RMK, «VNIISvetmet» EMK, «Ulttyq ıadrolyq ortalyq» RMK, «Sentrgeoanalıt» JShS, «Úlbi metallýrgııa zaýyty» AQ.
Osylaısha, memleketaralyq mártebesi bar osy kelisimdi ratıfıkasııalaý metrologııa salasyndaǵy ólsheý nátıjelerine degen senimdi arttyrady jáne ónimniń sapasy men qaýipsizdigin qamtamasyz etedi. Memleketaralyq standartty úlgiler suranysqa ıe jáne ekonomıkanyń ártúrli salalarynda keńinen qoldanylady. Ulttyq tizilimde 634 standartty úlgi tirkelgen. Onyń ishinde 337 standartty úlgi memleketaralyq standartty úlgiler tizilimine engizildi.
«Bıyl bizdiń standarttaý jáne metrologııa ınstıtýty memleketaralyq standartty úlgiler tizilimine engizilgen 163 standartty úlgi ázirlegenin atap ótkim keledi», dep tolyqtyrdy Baqyt Sultanov.