Ulybrıtanııada koronavırýspen aýyrǵandardy emdeıtin jańa dárilik preparat qoldanyla bastady. Antıdene arqyly ázirlengen bul dári qaterli derttiń qaýpin azaıtady.
Ǵalymdardyń aıtýynsha, «Sotrovımab» dep atalatyn jańa preparat Omicron sekildi vırýstyń jańa shtamdaryna da tıimdi bolmaq. Ony tamyrǵa tamshylatý arqyly quıady. Preparat vırýspen baılanysyp, onyń jasýshalarymyzǵa enýin toqtatady.
Klınıkalyq synaq kezinde bir rettik doza eresekterdiń aýrýhanaǵa jatý kórsetkishin jáne ólim qaýpin 79 paıyzǵa tómendetti. Bul – Ulybrıtanııa densaýlyq saqtaý mekemesi maquldaǵan ekinshi dárilik preparat.
«Ronaprev» jáne «Sotrovımab» sekildi antıdene arqyly emdeý tásili vırýsty juqtyra sala qoldanǵanda tıimdiligin kórsetip otyr. Dári-dármekter men densaýlyq saqtaý ónimderin retteý agenttigi (MHRA) atalǵan preparattardy naýqastyń belgileri paıda bolǵannan keıin bes kún ishinde qoldanýǵa keńes beredi.
«Sotrovımab» (Xevudy) preparatyn ázirlep shyǵarǵan GSK kompanııasy qazirgi tańda jańa zerthanalyq synaq júrip jatqanyn habarlady. Bul synaq búkil álemge taralyp jatqan Omicron nusqasyna qanshalyqty qarsy tura alatynyn anyqtamaq.
Naqty nátıjege qol jetkizý úshin qosymsha derekter qajet. Biraq zertteýshiler bul preparat vırýstyń áli úlken ózgeristerge nemese mýtasııalarǵa ushyramaǵan proteıniniń bir bóligine baǵyttalǵanyn aıtady. Iаǵnı Omicron-ǵa qarsy tura alady.
Jalpy, koronavırýsqa qarsy birneshe emdeý tásili bar. Olardy úsh sanatqa bólip qarastyrýǵa bolady. Birinshisi, vırýsqa tikeleı shabýyl jasaıtyn antıdeneler. Iаǵnı ony aýrýdan jazylǵandardyń qan plazmasynan nemese zerthanada ázirleıdi. Keıingisine «Ronaprev» jáne «Sotrovımab» sekildi preparattar kiredi.
Ekinshisi, «Molnýpıravır» sekildi vırýsqa qarsy preparattar. Olar koronavırýstyń denede taralýyn tejeıdi. Úshinshisi, ımmýndyq júıeni tynyshtandyratyn «Deksametazon» sııaqty preparattar.