Jaqynda Sozaq aýdanynyń ortalyǵy Sholaqqorǵan aýylynda beınebaqylaý qondyrǵylarynyń ortalyq júıesiniń ashylý rásimi ótti. Osy jyldan bastap aýdan ákimi Amanǵalı Aımurzaevtyń bastamasymen jergilikti halyqtyń tynyshtyǵy men tártibin qadaǵalap, quqyq buzýshylyqtyń aldyn alý maqsatynda aýdandyq bıýdjet esebinen 43 mıllıon teńgege 24 beınebaqylaý qondyrǵylary alynyp, negizgi nysandarǵa ornatylyp, iske qosylǵan bolatyn.
Ońtústik Qazaqstan oblysyna arnaıy issaparmen kelgen Ishki ister mınıstriniń orynbasary Erlik Kenenbaev jaqynda Sozaq aýdanynda bolyp, el ishindegi tártip pen rettiliktiń deńgeıimen tanysyp, aýdandyq ishki ister bólimi qyzmetkerleriniń jumys júıesin kórdi. Jáne jylqy jylyn jaǵymdy jańalyqpen bastap, ozyq tehnologııalyq qondyrǵylarmen jabdyqtalǵan aýdandyq ishki ister bóliminiń ortalyq júıesiniń ashylý rásimine qatysty. Aýdandyq ishki ister bóliminiń bastyǵy J. Álimbekov vıse-mınıstrge aýdan ortalyǵynyń negizgi 24 núktesine ornatylǵan beınebaqylaý jumysynyń shartty oryndaýlary men baqylaý jasap otyrǵan operatorlardyń is-áreketteriniń jelisin túsindirdi. Sondaı-aq, bólimdegi jedel toptyń shuǵyl is-qımyldaryn beınebaqylaý arqyly kórsetti. «Mundaı beınebaqylaý qondyrǵylary respýblıka kóleminde oblys ortalyqtary men úlken qalalarda ornatylǵanymen, aýdandar boıynsha birinshi ret osy Sozaq aýdanynda ornatylyp tur. Osyndaı ıgi iske qoldaý tanytqan aýdan ákimi Amanǵalı Aımurzaevqa rızashylyǵymyzdy bildiremiz. Bul júıe birinshi kezekte el ishindegi quqyq buzýshylyqtyń aldyn alýǵa, qoǵamdyq tártiptiń saqtalýyna úlken áserin tıgizedi» degen mınıstrdiń orynbasary E.Kenenbaev quqyq qorǵaý organy qyzmetkerleriniń aldaǵy is-áreketterine sáttilik tilep, aýdan ákimi A.Aımurzaevqa Ishki ister mınıstriniń buıryǵymen belgilengen «QR Ishki isteri salasyna 20 jyl» mereıli medalin tapsyrdy. Osyndaı marapatqa Sozaq aýdandyq ishki ister bóliminiń bastyǵy, polısııa podpolkovnıgi J.Álimbekov te ıe boldy.
Nurjamal MAIÝSOVA.
Ońtústik Qazaqstan oblysy.