Elbasy Nursultan Nazarbaev Qyrǵyzstan Prezıdenti Ákimshiliginiń Basshysy – Mınıstrler kabınetiniń tóraǵasy Aqylbek Japarovty qabyldady, dep habarlaıdy Egemen.kz.
Kezdesýde Nursultan Nazarbaev Qazaqstan men Qyrǵyzstannyń baýyrlas halyqtarynyń tarıhı jaqyndyǵyn atap ótti. Qazaqstannyń Tuńǵysh Prezıdenti eki memleket arasyndaǵy mádenı-gýmanıtarlyq baılanysty nyǵaıta túsýdiń mańyzdylyǵyna nazar aýdardy.
Osy oraıda Elbasy Qyrǵyzstan jastarynyń elimizdegi joǵary oqý oryndarynda bilim alýy úshin grant bólý múmkindigi týraly aıtty. Qyrǵyz Respýblıkasy Mınıstrler kabınetiniń Tóraǵasy Nursultan Nazarbaevqa Qyrǵyzstan halqyna árdaıym qoldaý kórsetip kele jatqany úshin alǵysyn bildirip, Qyrǵyz Respýblıkasynyń Prezıdenti Sadyr Japarovtyń izgi tilegin jetkizdi.
Sonymen qatar Aqylbek Japarov Tuńǵysh Prezıdenttiń basshylyǵymen táýelsizdik jyldarynda Qazaqstannyń qol jetkizgen tabystaryna erekshe toqtalyp, Elbasynyń eki el halyqtary arasyndaǵy tatý kórshilik qarym-qatynasty nyǵaıtýǵa qosqan zor úlesin atap ótti.