«Táýelsizdik kemesinde» atty kórmede sýretshi Nurjan Saýytbekov te óziniń jańa týyndysyn kórsetti. Ol jas avtorlardy qoldaý men shabyttandyrýdyń qajettigin atady, dep habarlaıdy Egemen.kz.
Nurjan Saýytbekov — Nursultan Nazarbaev Qory syılyǵynyń laýreaty, QR Sýretshiler Odaǵynyń múshesi, T.Júrgenov atyndaǵy QazUО́A kolledjinde arnaıy pánderdiń oqytýshysy.
Qylqalam sheberi 2015 jyly beıneleý óneri salasyndaǵy jetistigi úshin Qordyń syılyǵyn ıelendi.
«Bul meniń shyǵarmashylyǵymdy damytýǵa dem berdi, eńbegimniń tyń qyryn ashýǵa septigin tıgizdi. Mundaı qoldaý kásibimniń elge kerek ekenine dálel. Daryndy qazaqstandyq jastardy júıeli negizde keshendi qoldaǵany úshin Qorǵa rızamyn. Jas sýretshilerdi elep-eskerý, qoldaý, shabyttandyrý qajet. Talantty jandardy kótermeleýde munyń mańyzy zor», deıdi ol.
«Táýelsizdik kemesinde» ekspozısııasynda keskindeme, músin, grafıka, dızaın jáne sándik-qoldanbaly óner salasyndaǵy 100-den astam biregeı týyndy qoıylǵan. Avtorlar shyǵarmasy arqyly elimizdiń ulttyq mádenıetiniń ereksheligin beınelep, Qazaqstannyń ásem tabıǵatyn pash etti, súıikti qalanyń atmosferasyn kórsetti. Ol beıneleý jáne sándik-qoldanbaly ónerdi nasıhattaýǵa, patrıotızmge tárbıeleýge jáne jas urpaqqa táýelsizdiktiń qundylyǵyn dáripteýge baǵyttalǵan.
Nursultan Nazarbaev Qorynyń 2021-2022 oqý jylyndaǵy stıpendıattary – Nazym Meırambek pen Dana Nurshaeva da týyndylaryn usynǵan bolatyn.
Nazym abstraksııa, ınterer dızaıny jáne núktelik keskindeme tárizdi birden úsh eńbegin usyndy. Al Dana Nurshaeva Almatydaǵy Abaı atyndaǵy opera jáne balet teatryna arnalǵan kartınasy arqyly Kúlásh Baıseıitova, Shara Jıenqulova, Evgenıı Brýsılovskıı jáne t.b. ulttyq óner qaıratkerlerine qurmet kórsetti.
Aıta keteıik, Táýelsizdiktiń mereıtoıyna arnalǵan shyǵarmashylyq jobany Nursultan Nazarbaev Qory men T.Júrgenov atyndaǵy Qazaq ulttyq óner akademııasynyń kolledji uıymdastyrdy.
Ekspozısııany ashqan Nursultan Nazarbaev Qory jobasynyń aǵa úılestirýshisi Gúlnár Ershımanova: «Nursultan Nazarbaev Qory talaı jyl boıy ózin jáne eldi damytqysy keletin daryndy, jasampaz balalardy izdeýmen, olarǵa qoldaý kórsetýmen aınalysyp keledi. Bul kórme sııaqty alańdar jaı ǵana ekspozısııa emes, jas sýretshilerdiń ózderin tanytýdyń, eńbegin elge kórsetýdiń biregeı múmkindigi», dedi.
2021 jyldyń 30 jeltoqsanyna deıin jalǵasatyn kórme sońynda avtorlardyń eńbekteri qamtylǵan arnaıy katalog jaryq kóredi.