«Bazis-A» korporasııasy dırektorlar keńesiniń tóraǵasy Aleksandr Belovıch Prezıdenttik jastar kadr rezerviniń múshelerimen kezdesý barysynda Qazaqstandaǵy qurylys salasy boıynsha pikir bildirdi, dep habarlaıdy Egemen.kz.
«Qazaqstanda qurylys salasy keıingi jyldary, ásirese bıyl keremet órleýdi bastan keshirip otyr. Memlekettik tapsyrys ta, jeke qurylys jobalary da óte kóp. Men sizderge aıtaıyn, buǵan deıin jyldar boıy 1991 jylǵy turǵyn úıdi paıdalanýǵa berý kórsetkishin eńsere almaı keldik. Sovet kezeńinen qalǵan memlekettik baǵdarlama bar edi. Sol baǵdarlama aıasynda Qazaqstan bir jylda 11,5 mln sharshy metr turǵyn úı qoldanysqa bergen. Osy mejeni birneshe jyl buryn ǵana eńserdik», dedi bıznesmen jastarmen kezdesý barysynda.
Sondaı-aq, ol bıyl elorda baspana qurylysy boıynsha rekordtyq kórsetkishke jetkenin aıtty.
«Bes jyl 1991 jyldyń mejesin eńsersek, bıyl 20 mln sharshy metr turǵyn úı paıdalanýǵa berilmek. Jalpaqtap aıtsaq, eldegi ár adamǵa bir sharshy metrden astam baspana keledi degen sóz. Álemde mundaı kórsetkish óte az. Mysaly Reseı Federasııasynda jylyna bir adamǵa 0,5-0,6 sharshy metr baspana salynady. Al bizde bir adamǵa - 1 sharshy metr. Odan ári Úkimettiń jospary munymen shektelmeıdi. Bizdiń aldymyzda jylyna paıdalanýǵa beriletin baspananyń kólemin bir adamǵa 1,2-1,3 sharshy metrge deıin ulǵaıtý mindeti tur. Nur-Sultanda jylyna adam basyna 3 sharshy metr turǵyn úı salynady. Bul, tipti, álemdik rekord bolýy da múmkin. Mysaly, Máskeýde bir adamǵa 0,3 sharshy metr baspana salynady. Mine, qurylys salasynyń damý qarqyny osyndaı», dep qosty Aleksandr Belovıch.