Qazaqstannyń táýelsizdik alǵanyna 30 jyl tolyp otyr. Osyǵan oraı uıymdastyrylǵan merekelik sharada saıasatkerler men halyqaralyq sarapshylar el astanasyna jınaldy.
«Kóshbasshylyq. Turaqtylyq. Progress» atty konferensııada táýelsiz Qazaqstandaǵy memlekettik qurylys tájirıbesi men respýblıkanyń osy ýaqyt aralyǵyndaǵy jetistikteri talqylandy. Táýelsizdiktiń otyz jyly turaqty ekonomıkalyq progress dáýirine aınaldy.
Birikken Ulttar Uıymynyń «Elektrondy úkimet» boıynsha sońǵy saýaldamasynda Qazaqstan elektrondy úkimetti damytý boıynsha 29-shy, al onlaın qyzmetterdiń sapasy boıynsha 11-orynǵa turaqtady. Zertteý eki jyl saıyn júrgiziledi. Onda BUU-ǵa múshe 193 memleketke saraptama júrgiziledi. Bul aqparattyq tehnologııa damýynyń negizgi kórsetkishi.
Búginde Qazaqstan sıfrlandyrý baǵdarlamasynyń jańa kezeńin bastan ótkerip jatyr. Sıfrlyq damý, ınnovasııalar jáne aeroǵarysh ónerkásibi mınıstrligi memlekettik qyzmet kórsetýdiń kóp platformaly modelin qurýdy maqsat etken. Onda adamdar ártúrli sıfrly platformalar men qosymshalar arqyly memleketpen baılanysa alady.
Qazir Qazaqstanda memlekettik qyzmetterdiń 90 paıyzdan astamy sıfrly túrde qoljetimdi, ony 11 mıllıonǵa jýyq adam paıdalanady. Degenmen budan arǵy tabys joǵary sapaly IT kadrlarynyń jetkilikti bolýyna baılanysty.
Nazarbaev Ýnıversıtette jasandy ıntellekt pen robottehnıka boıynsha jumystar qarqyndy júrip jatyr. Jas ǵalymdar qosymshalar men algorıtmder jazady, robottardy oqytady jáne vırtýaldy shyndyqty zertteıdi.
Táýelsizdik jyldarynda Qazaqstanǵa 325 mıllıard eýro tikeleı sheteldik ınvestısııa tartyldy. Bul Qazaqstan ekonomıkasyna Ortalyq Azııadaǵy jáne postkeńestik keńistiktegi eń serpindi ekonomıkalardyń biri bolyp qalýǵa múmkindik berdi.