Endi zeınetaqy jınaǵynyń shekti mólsherinen asatyn aqshaǵa jer telimin satyp alýǵa bolady. Bul týraly «Otbasy bank» basshysy Lázat Ibragımova aıtty, dep habarlaıdy Egemen.kz.
«Biz búgin osy opsııany iske qostyq. Endi zeınetaqy jınaǵynyń bir bóligine jer telimin satyp alýǵa bolady. Portalda arnaıy batyrma engizildi», dedi Ibragımova ortalyq kommýnıkasııalar qyzmetinde ótken onlaın brıfıngte.
Buǵan deıin zeınetaqy jınaǵynyń qarjysyna jekemenshik úı salýǵa ruqsat berilgen. Alaıda salymshylardyń kóbisi úı salý úshin aldymen jer telimin satyp alý qajettigin aıtqan.
«Jerdi eki maqsatta ǵana alýǵa bolady. Jeke turǵyn úı qurylysyna nemese jeke qosalqy sharýashylyqqa. Eki jyldyń ishinde úı salyp, bankke tıisti qujattardy jiberý kerek», dep túsindirdi Ibragımova.
Barlyq qujat enpf-otbasy.kz portalyndaǵy jeke kabınet arqyly jiberiledi.
Lázat Ibragımovanyń aıtýynsha, bar bolǵany eki qujatty jiberý kerek. Bireýi – úıdi paıdalanýǵa berý aktisi, ekinshisi – jyljymaıtyn múlikke tirkelgen quqyq pen onyń tehnıkalyq sıpattamasy týraly anyqtama.
Al eki jyldyń ishinde úı salynbasa, aqshany qaıtarýǵa týra keledi. Alaıda qujat rásimdeý jaǵynan qıyndyqtar týyndaǵan jaǵdaıda qosymsha ýaqyt berilýi múmkin.