Jańa Konstıtýsııanyń qabyldanýyna jáne referendýmnyń sátti ótýine oraı Májilistegi «Amanat» partııasy fraksııasynyń jıyny ótti. Depýtattar daýys berý nátıjesi azamattardyń tarıhı tańdaýyna aınalǵanyn, Prezıdent Qasym-Jomart Toqaevtyń reformalar baǵytyna degen qoǵamnyń jan-jaqty qoldaýyn rastaǵanyn atap ótti. Is-sharaǵa beınekonferensbaılanys rejimi arqyly óńirlik máslıhattardaǵy partııa fraksııalary da qatysty.
Májilis spıkeri, «Amanat» partııasynyń tóraǵasy Erlan Qoshanov otandastarymyzdyń basym kópshiligi jańa Konstıtýsııany qoldaǵanyn atap ótip, barsha azamatty osy jeńispen quttyqtady. Ortalyq referendým komıssııasynyń málimetine sáıkes, saıası naýqanǵa qatysqan adamdardyń 87,15%-y jańa Konstıtýsııaǵa daýys berdi. Onyń aıtýynsha, mundaı joǵary nátıje azamattardyń saıası mádenıetiniń artqanyn, olardyń Ádiletti Qazaqstandy qurýǵa degen umtylysyn aıqyn kórsetedi.
«15 naýryz el shejiresinde eleýli oryn alǵan tarıhı oqıǵa boldy. Bul – jurtymyzdy jumyldyrǵan, ultymyzdy uıystyrǵan aıtýly kún. Qýatty, Ádiletti, progressıvti Qazaqstandy tańdaǵan kún. Ol – memleket damýyndaǵy jańa kezeńniń bastalýy. Referendým halqymyzdyń Prezıdent reformalaryna zor senim artyp otyrǵanyn aıqyn kórsetti. Jańa Ata zańda mıllıondaǵan otandasymyzdyń talap-tilegi, úmit-senimi kórinis tapty. Sondyqtan jańa Konstıtýsııanyń qabyldanýy – búkil halqymyzdyń jeńisi. Mańyzdy qujat elimizdi tek bıik belesterge, uly murattarǵa jeteleı beredi dep senemin», dedi ol.
Erlan Qoshanov jańa Konstıtýsııanyń qabyldanýy memleketimizdegi túbegeıli ózgeristerdiń bastamasy ekenin atap ótti. Endi jańa Konstıtýsııanyń árbir baby mańyzdy normaǵa aınalyp, adamdardyń ıgiligi jolynda qyzmet etýi úshin áli de kóp jumys atqarý qajet. Bul qoǵamnyń barlyq progressıvti tobynyń kúsh-jigerin biriktirýdi talap etedi, al «Amanat» partııasy Prezıdenttiń saıası tiregi retinde osy jumystyń aldyńǵy shebinde bolýǵa tıis. Sondaı-aq ol partııa músheleri Jalpyulttyq koalısııa quramynda aýqymdy túsindirý jumysyn júrgizip, elimizdiń barlyq óńirine barǵanyn, adamdardyń úmiti men tilegin jaqsy biletinin jáne endi olardyń tolyq oryndalýy mańyzdy ekenin atap ótti.
Jańa Konstıtýsııanyń qabyldanýyna oraı, jıyn barysynda «Amanat» partııasynyń úndeýi de qabyldandy. Qujat mátinin partııanyń atqarýshy hatshysy Dáýlet Káribek oqyp berdi. Úndeýde 15 naýryz kúni halyq tarıhı ári sanaly tańdaý jasap, Prezıdent
Qasym-Jomart Toqaevtyń reformalar baǵytyna buryn-sońdy bolmaǵan qoldaý bildirgeni atalyp ótti. Bul – azamattar senim artatyn, kún saıyn óz tıimdiligin dáleldep, memleketti oń ózgeristerge jeteleıtin baǵyt. Sonymen qatar «Amanat» partııasy Memleket basshysynyń jetekshiligimen Ata zań normalaryn júzege asyrý jáne órkendegen Qazaqstan qurý jolynda óziniń barlyq resýrsyn – Parlament pen máslıhattardaǵy fraksııalaryn, óńirlik fılıaldar jelisin, jastar jáne volonterler qurylymdaryn jumyldyratyny aıtyldy.
Otyrys barysynda fraksııa depýtattary da sóz sóıledi. Erlan Saırov geosaıası týrbýlenttilik pen turaqsyzdyq jaǵdaıynda elimizge memlekettiń turaqtylyǵyn saqtaýǵa múmkindik beretin jańa Konstıtýsııa qajet ekenin aıtty. Sergeı Ponomarev jańa Konstıtýsııa qoǵamdyq kelisimdi nyǵaıtyp, qoǵamnyń etnosaralyq birligi sııaqty negizgi gýmanıtarlyq qundylyqtardy saqtaıtynyn atap ótti. Nartaı Sársenǵalıev jańa Konstıtýsııany qoldaý isindegi jastar qaýymynyń belsendi róline nazar aýdardy. Depýtattyń aıtýynsha, belsendi jastar tutas el aýmaǵynda myńdaǵan kezdesý ótkizdi. Sondaı-aq ol Konstıtýsııada volonterler qyzmetiniń bekitilýi jastardyń azamattyq belsendiligi artyp kele jatqanyn aıqyndaıtynyn atap ótti. Iýlııa Kýchınskaıa referendým qoǵamdyq pikirdiń aýqymdy kórinisine aınalyp, otandastarymyzdyń saıası kemeldigi men azamattyq jaýapkershiliginiń joǵary deńgeıin baıqatqanyn málimdedi. Al Erkin Ábil proporsıonaldy saılaý júıesin engizý jáne partııalardyń rólin kúsheıtý qadamy mazmundy saıası básekelestikke jaǵdaı jasaıtynyna toqtaldy. Mundaı jaǵdaıda saılaýshylar, eń aldymen, kandıdattyń jeke tulǵasyn emes, baǵdarlamasy men usynǵan ıdeıalaryn baǵalaıdy.