Inder aýdanynda jańa seh jumysyn bastady. Munda táýligine qurylys ındýstrııasyna arnalǵan 70 tonna qurǵaq qospalar shyǵarylady. Onyń ishinde sylaq pen jaryqty biteý úshin, edenge paıdalanylatyn gıps pen jelim sekildi 9 túrli qurǵaq qospa bar.
Oblystyq kásipkerlik jáne ındýstrııalyq-ınnovasııalyq damý basqarmasy basshysynyń mindetin atqarýshy Qanysh Mámbetovtiń aıtýynsha, jańa seh naryqty sapaly taýarlarmen qamtyp qana qoımaı, jergilikti turǵyndarǵa jańa jumys oryndaryn usynady. Qazir atalǵan sehqa 20 jas maman jumysqa ornalasty.
– Jergilikti turǵyndardy jumysqa ornalastyrý – ár deńgeıdegi ákimdikterdiń basty mindetiniń biri. Jańa sehtyń basshylarynyń jastarǵa jumys oryndaryn usynyp, bul bastamany qoldaǵany qýantady. Atyraý oblysynda qurǵaq qospalardy shyǵaratyn jalǵyz seh jobasynyń quny 250 mln teńgeni quraıdy, – dedi Qanysh Mámbetov.
Údemeli ındýstrııalyq-ınnovasııalyq damý memlekettik baǵdarlamasy aıasynda jańa sehty iske qosqan «ISI Gıps Inder» JShS-nyń negizin 27 jastaǵy jas kásipker Darhan Tórebekov qalaǵan. Onyń aıtýynsha, sehtyń jyldyq qýaty – 10 myń tonna. Qurǵaq qospalar 25 kılolyq qaǵaz qapqa salynady. Sapasy Qazaqstandaǵy osyndaı ónim shyǵaratyn tanymal brendter men reseılik óndirýshilerdiń taýarynan kem túspeıdi. Al baǵasy naryqtaǵydan 30 paıyzǵa tómen.
– Bizde qurylysta keńinen qoldanylatyn qurǵaq qospalardyń barlyq túri shyǵarylady. Jalpy, bul óndiris 2017 jyly iske qosylǵan edi. Biraq tolyq qýatynda jumys istemedi. Jaqynda qajetti qondyrǵyny satyp aldyq. Sodan keıin jumys jandandy. Qazir JM-kapıtal, SDN Construction, B+ sekildi iri qurylys kompanııalarymen áriptestik baılanys ornattyq. Bolashaqta jumysshylar sanyn 50-ge deıin jetkizýdi josparlap otyrmyz, – deıdi D.Tórebekov.
Atyraý oblysy