Eýropalyq Odaqqa múshe 27 el koronavırýsqa qarsy 1 mlrd-tan astam sıfrlyq qaýipsizdik sertıfıkatyn shyǵardy. Bul sandy Eýropalyq komıssııanyń basshysy Ýrsýla fon der Lıaıen aıtyp ótti, dep habarlaıdy Egemen.kz.
«Eýropalyq Odaq sertıfıkaty – 60 el men aımaqty qamtıtyn álemdik standart. Bul EO jáne onyń syrtynda qaýipsiz saıahattaýǵa múmkindik beredi», dedi Ý.Lıaıen Twitter jelisi arqyly.
Seısenbi kúni Eýrokomıssııa Covid-19 vırýsyna qarsy vaksınanyń sıfrlyq sertıfıkaty 270 kúnge (9 aı) jaramdy bolatynyn qarastyratyn erejelerdi bekitti. Qatysýshy elder kovıd-sertıfıkattary ıeleriniń búkil Odaq aýmaǵynda erkin saıahattaýy úshin buǵan yńǵaılanýy tıis.
Sertıfkat jaramdylyǵynyń merzimi Eýropa Aýrýlardyń aldyn alý jáne qadaǵalaý ortalyǵy usynǵan keńester negizinde ornatylǵan. Adam COVID-19 vırýsyna qarsy vaksınalaýdyń bastapqy kýrsy aıaqtalǵannan keıin alty aı ótken soń vaksınanyń býsterlik dozasyn alýy tıis. Bul merzimge taǵy úsh aı qosylǵan. Jańa tártip 2022 jyldyń 1 aqpanynan bastap kúshine enedi. 9 aılyq merzim sońǵy dozany alǵannan bastap esepteledi.
Sıfrlyq kovıd-sertıfıkatynyń toǵyz aılyq merzimi qatardaǵy eýropalyqtarǵa senimdi saıahattaýǵa arnalǵan. Qazirgi kezde EO-ǵa múshe elderdiń mindeti – adamdarǵa vaksınanyń «býsterlik» dozasyn alý múmkindigin jedel qamtamasyz etý.
Sıfrlyq qaýipsizdik sertıfıkaty – adam koronavırýsqa qarsy ekpe alǵanyn, aýrýdan jazylǵanyn nemese PTR teris nátıjesin kórsetetin qujat.