Qyrymbek Kósherbaev saıası qýǵyn-súrgin qurbandaryn tolyq aqtaý jónindegi memlekettik komıssııanyń kezekti otyrysyn ótkizdi, dep habarlaıdy Egemen.kz.
Otyrysta saıası qýǵyn-súrgin qurbandaryn tolyq aqtaý jónindegi memlekettik komıssııanyń Jobalyq keńsesi, kishi komıssııalary, jumys toptary jáne óńirlik fılıaldarynyń bıylǵy atqarǵan qyzmetiniń negizgi qorytyndylary qarastyrylyp, 2022 jylǵa arnalǵan jumystyń basym baǵyttary aıqyndaldy.
Jıyn barysynda Premer-Mınıstrdiń orynbasary Eraly Toǵjanov, Bilim jáne ǵylym mınıstri Ashat Aımaǵambetov, Mádenıet jáne sport mınıstri Aqtoty Raıymqulova, Aqparat jáne qoǵamdyq damý mınıstri Aıda Balaeva, Almaty qalasynyń ákimi Baqytjan Saǵyntaev, Mańǵystaý oblysynyń ákimi Nurlan Noǵaev jáne basqalar baıandama jasady.
Sondaı-aq, Bas prokýror Ǵızat Nurdáýletov, Ishki ister mınıstri Erlan Turǵymbaev jáne Ulttyq qaýipsizdik komıteti tóraǵasynyń orynbasary Nurǵalı Bilisbekov jabyq qorlarda júrgizilgen jumystar týraly baıandady. Memlekettik komıssııa tóraǵasy Qyrymbek Kósherbaev búgingi tańda ortalyqta jáne óńirlerde Memlekettik komıssııanyń tutas uıymdyq qurylymy qalyptasqanyn, ádistemelik baza ázirlenip, zertteý jumystaryna qatysty biryńǵaı ádistiń aıqyndalǵanyn, maqsatty aqparattyq strategııa qurylyp, memlekettik, vedomstvolyq jáne sheteldik arhıvterde júıeli izdestirý jumystary jolǵa qoıylǵanyn atap ótti.
Jıynda saıası qýǵyn-súrgin qurbandarynyń jalpy bazasyn jáne Memlekettik komıssııa qurylymdarynyń qyzmeti týraly aqparattardy qamtıtyn Memlekettik komıssııanyń elektrondyq portaly tanystyryldy.
Sonymen birge, komıssııa músheleri Memlekettik arhıvterde qurylǵan qýǵyn-súrgin máseleleri jónindegi arnaıy qorlar jaıynda, TMD jáne Eýropalyq Odaq elderimen halyqaralyq yntymaqtastyqty damytý týraly baıandady.
Otyrys qorytyndysy boıynsha Úkimetke, ortalyq jáne jergilikti atqarý, quqyq qorǵaý organdarynyń basshylaryna 2022 jylǵa arnalǵan jumystyń basym baǵyttary boıynsha, atap aıtqanda, jınaqtalǵan arhıv materıalyn taldamalyq jáne saraptamalyq baǵalaýdy uıymdastyrý, aımaqtarda zertteý jumysyn qamtamasyz etý jáne Memlekettik komıssııanyń baspa qyzmetin keńeıtý jóninde naqty tapsyrmalar berildi.