Bar jaqsylyq – balalarǵa

– Qazir Atyraý qalasynda 96 bala­baqsha jumys istep tur. Onyń ishinde 46 memlekettik balabaqshada 12 030 bala tárbıelenedi. Sondaı-aq 50 jekemenshik balabaqshaǵa 4 455 bala baryp júr. Osyndaı 34 balabaqshaǵa memlekettik tapsyrys beriledi. Endi, mine, mektepke deıingi tálim-tárbıe beretin taǵy bir balabaqsha iske qosyl­dy. Bul – osy aýylda turatyn otbasylar úshin úlken qýanysh, – deıdi Aty­raý qalasynyń ákimi Qaırat Orazbaev.

Jańa nysannyń qurylysyna demeý­shilik kórsetken kompanııanyń úki­metpen jáne jurtshylyqpen baı­lanys bóliminiń bas menedjeri Rza­bek Artyǵalıevtiń málimetinshe, ba­la­baq­shanyń jalpy aýdany 2 785 sharshy metrdi quraıdy. Balabaqsha aýmaǵynda 14 toptyq, deneshynyqtyrý jáne jol qozǵalysy erejelerin zertteý­ge arnalǵan alań jabdyqtalǵan. Ǵı­maratta gımnastıkaǵa, mýzyka saba­ǵyna, dene tárbıesine arnalǵan zaldar, sondaı-aq ámbebap úıirme bólmesi bar.

– Bizdiń kompanııa bilim berýdiń sapasy men qoljetimdiligin damytýǵa erekshe kóńil bólip otyr. Sol sebepten, ár bala men jasóspirimniń jeke qabiletin jetildirý úshin be­ıin­di daǵdylarǵa oqytý, kásiptik baǵ­darlaý jobalaryna udaıy qoldaý kór­setip keledi. Máselen, bıyl kórý qabiletinen aıyrylǵan jáne nashar kóretin balalarǵa Braıl qarpin qazaq, aǵylshyn jáne orys tilderinde biregeı trenajerdiń kómegimen úıretýge kó­mektesetin Sezual jobasyna qoldaý bildirdi. Taǵy bir mysal – akademık Qabdolov qoryna kórsetilgen qol­daý. Bul qor Qazaqstannyń barlyq aıma­ǵynda áleýmettik jelilerdiń kóme­gimen qazaq tilin úırenýshilerdi yntalandyryp otyr, – deıdi R.Artyǵalıev.

Atyraý qalasynyń «Bereke» sha­ǵyn aýdanynda jańa mekteptiń boı kótergeni turǵyndardy qýanyshqa keneltti. Mekteptiń ashylý saltanatyna qatysqan oblys ákimi Mahambet Dosmuhambetovtiń pikirinshe, táýel­sizdik jyldarynda bilim berý salasyna aıryqsha kóńil bólinipti. Jyl saıyn bilim berý mekemeleriniń materıaldyq-tehnıkalyq bazasy ja­ńartylyp keledi.

– Táýelsizdik alǵannan bergi 30 jylda oblysta 95 mektep pen 7 teh­nı­kalyq-kásiptik bilim beretin oqý orny­nyń ǵımaraty salynyp, paıdalanýǵa berildi. Endi aldaǵy jyly 8 mekteptiń qurylysy aıaqtalady dep josparlanyp otyr. Bul baǵyttaǵy is-sharalar jalǵasyn tabady. О́ıtkeni bizdiń basty maqsatymyz – jas býynnyń alańsyz, sapaly bilim alýyna qolaıly jaǵdaı jasaý, – deıdi M.Dosmuhambetov.

«Bereke» – sońǵy jyldary boı kótergen jańa shaǵyn aýdan. Mun­da birneshe kópqabatty úı salynyp, turǵyndar sany artty. Biraq sha­ǵyn aýdanda osy kezge deıin bilim oshaǵy bolǵan joq. Sol sebepten, sha­ǵyn aýdan­da turatyn otbasylardyń 824 ba­lasy qaladaǵy basqa mektep­terde bilim alyp kelgen. Endi ja­ńa­­dan ashylǵan 1 200 oryndyq mek­tep zamanaýı qural-jabdyqtarmen qamtyl­ǵan. Mektepte 360 oryndyq má­jilis zaly, ashana, jazǵy sport alańy bar. Al sport zaly boks, ústel tennısi, basketbol, voleıbol, kishi aıaqdop túrlerine negizdelip salynǵan. Buǵan qosa mektepte arnaıy qaýipsizdik úshin beınebaqylaý bólmesi qarastyrylǵan.

Isataı aýdanynda Janbaı degen aýyl bar. Kaspıı teńiziniń jaǵalaýyna taıaý oryn tepken aýyldyń turǵyny kóp. Soǵan saı boı túzep kele jatqan balalar sany az emes. Aýyldyń áleý­mettik máseleleri birtindep sheshi­min taýyp otyr.

Jaqynda osy aýylda «Jalyndy Qurylys» JShS sport kesheniniń qu­rylysyn aıaqtady. Eki qabatty sport kesheni qajetti qural-jabdyqtarmen tolyq qamtamasyz etilgen. Munda bir mezgilde 300-ge jýyq jasóspirim boks, voleıbol, basketbol, karate, taek­vando, qazaq kúresi sekildi sport túr­lerimen shuǵyldana alady. Sondaı-aq oılaý qabiletin jetildiretin toǵyz­qu­malaq oıyny úshin de jaǵdaı jasalǵan.

– Elimizdi álemge tanytyp júrgen chempıondarymyz alystaǵy eldi mekenderden kóptep shyǵyp jatyr. Bola­shaqta Janbaı aýylynan da Azııa, álem, Olımpıada chempıondary shyǵady degen senimdemiz. Osy oraıda endi aýyl bala­larynyń sporttyń birneshe túrimen alańsyz shuǵyldanýyna tolyq múmkindik bar. Aýyl sportyn damytý úshin osyndaı qoldaý sharalary jalǵasa beredi, – deıdi oblys ákiminiń orynbasary Narıman Taýshov.

Atyraý oblysy