QR Sybaılas jemqorlyqqa qarsy is-qımyl agenttiginde habarlaǵandaı, Qaraǵandy oblysynda zańnamalyq tyıymǵa qaramastan kásipkerlik qyzmetpen aınalysqan laýazymdy tulǵalar jaýapkershilikke tartyldy, dep habarlaıdy Egemen.kz.
«Rýhanı jańǵyrý» óńirlik jobalyq keńsesi basshysynyń orynbasary memlekettik fýnksııalardy oryndaýǵa ýákilettik berilgen tulǵalarǵa teńestirilgen tulǵa bola otyryp, qabyldanǵan sybaılas jemqorlyqqa qarsy shekteýlerdi buza otyryp, kásipkerlik qyzmetpen aınalysqan», delingen agenttik habarlamasynda.
Onyń atyna tirkelgen JK Temirtaý mádenıet saraıyna «Rýhanı jańǵyrý» baǵdarlamasy aıasynda «Jaýyrtaýdaǵy kezdesý» festıvalin ótkizý boıynsha 3,9 mln teńge somasyna qyzmet kórsetti.
Osyǵan uqsas fakt Qaraǵandy qalasy Qazybek bı atyndaǵy aýdannyń sanıtarlyq-epıdemıologııalyq baqylaý basqarmasynyń bas mamanyna qatysty anyqtaldy.
«Onyń jeke kásipkerligi memlekettik organdar men uıymdarǵa azyq-túlik emes taýarlardy jetkizýmen aınalysqan», dep qosty agenttiktiń baspasóz qyzmeti.
Atalǵan tulǵalar Qaraǵandy qalasynyń mamandandyrylǵan aýdanaralyq ákimshilik sotynyń qaýlysymen ÁQBtK-niń 154-baby boıynsha kináli dep tanylyp, árqaısysyna 408 380 teńge kóleminde aıyppul salyndy.
2021 jyldyń basynan bastap Sybaılas jemqorlyqqa qarsy qyzmet ákimshilik quqyq buzýshylyq týraly 109 is qozǵady, 31,2 mln teńge kóleminde aıyppul salyndy. Ákimshilik jaýapkershilikke 100 jeke jáne 2 zańdy tulǵa tartyldy.