Parlament Májilisiniń búgingi jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine básekelestikti damytý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristerdi qabyldady, dep habarlaıdy Egemen.kz.
Zań jobasy memlekettiń kásipkerlikke qatysýyn qysqartýǵa, kásipkerlik sýbektileriniń memlekettik qoldaý sharalaryna teń qol jetkizýin qamtamasyz etýge, shaǵyn jáne orta kásipkerlikti damytýǵa, sondaı-aq taýar naryqtaryna kirý úshin ákimshilik jáne ekonomıkalyq kedergilerdi barynsha qysqartýǵa baǵyttalǵan.
«Atalǵan zań jobasy 8 jeltoqsanda maquldandy jáne ol Senatqa qabyldanǵan 152 pozısııamen jiberildi. Senat engizgen túzetý naqtylaý sıpatyna ıe, Májilis maquldaǵan zań jobasynyń tujyrymdamasy men mazmunyn ózgertpeıdi. Komıtet (Májilistiń Ekonomıkalyq reforma jáne óńirlik damý komıteti) «Qazaqstan Respýblıkasynyń keıbir zańnamalyq aktilerine básekelestikti damytý máseleleri boıynsha ózgerister men tolyqtyrýlar engizý týraly» zań jobasyna Senat engizgen ózgeristermen kelisýdi usynady», dedi Májilis depýtaty Samat Aqyshev.
Qujatty qaraý kezinde depýtattar bul usynysty biraýyzdan qoldady.