«Eńbek» nátıjeli jumyspen qamtýdy jáne jappaı kásipkerlikti damytý jónindegi memlekettik baǵdarlamany iske asyrýdyń ózekti máseleleri Nur Otan partııasy janyndaǵy Jumyspen qamtýdy jáne halyqtyń áleýmettik osal toptaryn qoldaý jónindegi respýblıkalyq qoǵamdyq keńestiń kezekti otyrysynda talqylandy.
Eńbek jáne halyqty áleýmettik qorǵaý vıse-mınıstri Erjan Birjanov málimdegendeı, 2017 jyldan bastap qazirgi ýaqytqa deıin elimizdiń eńbek kúshi artyq óńirinen eńbek kúshi tapshy aımaǵyna 9,1 myń otbasy qonys aýdaryp, 10,9 myń azamat jumysqa ornalastyrylǵan. «Qonys aýdarýshylardy baspanamen qamtamasyz etý úshin keıin satyp alý quqyǵymen jaldamaly turǵyn úı usyný tetigi iske asyrylýda. Soltústik Qazaqstan oblysynda 2019-2020 jyldary 1 003 úı, 2020 jyly Pavlodar oblysynda 307 páter satyp alyndy», dedi vıse-mınıstr.
Alaıda Keńes tóraǵasy, Májilis depýtaty Elnur Beısenbaev atalǵan turǵyn úılerdiń sapasyna qatysty azamattardan kóp shaǵym túsip jatqanyna nazar aýdartyp, jergilikti atqarýshy organdar bul máselege jaýapkershilikpen qaraý qajettigin atap ótti. Mysaly, bıylǵy qańtardan qazan aıyna deıin Túrkistan oblysynan soltústik óńirlerge 417 otbasy nemese 2 myńdaı adam kóship barǵan. Nur Otan-nyń Túrkistan oblystyq fılıaly tóraǵasynyń birinshi orynbasary Beısenbaı Tájibaev bul san budan da kóp bolýy múmkin edi dep esepteıdi. Ol ishki kóshi-qondy yntalandyrý úshin birqatar usynysty ortaǵa saldy. Ishki kóshi-qondy úılestirip otyrý úshin tikeleı jeli ashý qajet. Saıt ashyp, málimetterdiń barlyǵy barynsha qoljetimdi bolýy úshin barlyq derekti bir bazaǵa jınaqtaǵan jón. Múmkindigine qaraı soltústik óńirlerdiń ákimdikteri bizdiń oblystyń halyq tyǵyz qonystanǵan aýdandarynan front-ofıs túrinde óz ókildikterin ashýy tıis. Bul tek qonys aýdarý prosesin jedeldetip qana qoımaıdy, sonymen qatar bolashaq qonys aýdarýshylar úshin de edáýir jeńildik týǵyzady», dedi B.Tájibaev.
Qonys aýdarýshylardyń basym bóligi aýyl sharýashylyǵynda jumys istegisi keletindikten, nurotandyqtar olar úshin 1-2%-pen jeńildetilgen nesıe ázirleýdi usyndy.
Keńes músheleri Nur Otan-nyń eńbek salasyndaǵy saılaýaldy ýádeleriniń oryndalý barysyn da qarastyrdy. Bıyl 730 myńnan astam adam «Eńbek» baǵdarlamasynyń qatysýshysy bolǵan, «Bastaý bıznes» jobasyn bitirýshiler sany 33 myńnan asqan. 5 myńnan astam jumyssyz azamat enbek.kz Elektrondy eńbek bırjasy arqyly qysqa merzimdi kýrstardan ótken. «Pandemııaǵa qaramastan, elimizde jumyssyzdyq deńgeıi 4,9%-dy quraıdy. Eńbek daýlary men shıelinisterin sheshý tártibin ońtaılandyrý boıynsha zańnamaǵa túzetýler paketi ázirlendi. Memleket basshysy Qasym-Jomart Toqaev óz Joldaýynda kelesi jyldyń 1 qańtarynan bastap eń tómengi jalaqyny 42,5-ten 60 myń teńgege deıin kóterý týraly málimdedi. Bul da partııanyń saılaýaldy baǵdarlamasymen ushtasyp otyr», dedi Keńes tóraǵasy.