Shymkent qalasyna jasalǵan lańkestik jáne jappaı buzaqylyq áreketterge baılanysty qala ákimi Murat Áıtenovtiń basshylyǵymen arnaıy shtab quryldy, dep habarlaıdy Egemen.kz Shymkent qalasy ákimdiginiń baspasóz qyzmetine silteme jasap.
Qala ákiminiń basqarýynda barlyq quqyq qorǵaý organdarynyń basshylaryn qamtyǵan shtabtyń der kezinde shyǵarǵan sheshimderi men is-áreketteriniń nátıjesinde megapolıstegi eshqandaı strategııalyq mańyzy bar nysan lańkesterdiń ıeligine ótpegen.
Sońǵy eki kúnde sodyrlardyń negizgi maqsaty qala ákimdigin basyp alý bolǵan-dy. Degenmen «Túrkistan» saraıy, «Kórme» ortalyǵy (tolyǵymen), J. Shanın atyndaǵy drama teatryna ár túrli deńgeıde zııan keltirdi.
Odan bólek, «Metro» saýda ortalyǵyna basyp kirip, barlyq spırttik ishimdikter men energetıkalyq sýsyndardy alyp ketken. Saýda ortalyǵynyń ishin qıratyp, eki jerde órt shyǵarý áreketine barǵan jáne bankomattar tonalǵan.
Sol kúnderi lańkester kóptegen polısııa avtokóligi men qoǵamdyq avtobýstardy jaǵyp jiberdi.
Qazirgi tańda qalada jaǵdaı turaqty jáne baqylaýda. Turǵyndardyń tynys-tirshiligi úshin kerekti barlyq qurylymdar óz jumysyn tolyqqandy atqarýda.
Qala ákimi zardap shekken nysandardyń barlyǵyn aralap, materıaldyq shyǵyndardy anyqtaý úshin qurylǵan arnaıy komıssııaǵa naqty tapsyrmalar berdi. Aldaǵy 10 kún ishinde jalpy shyǵyn mólsheri anyqtalatynyn atap ótti.
«Qalamyzdaǵy qaýipsizdik pen tynys-tirshilik úshin kerekti barlyq jumystar baqylaýymda. Qaladaǵy qoǵamdyq kólikter men bıznes nysandary shtattyq rejımde jumys jasaýda. Antıterror is-sharasy júrgizilip jatqandyqtan, qala turǵyndaryn barynsha úıden shyqpaýǵa jáne balalardy qaraýsyz qaldyrmaýǵa shaqyramyn. Jastarymyz túrli arandatýshylyqqa jol bermeı, sabyrlyq tanytýy kerek. Qala turǵyndary men qonaqtaryn kommendanttyq tártipti saqtaýǵa shaqyramyn», dedi Murat Áıtenov.