Serdjo Mattarella Italııanyń prezıdenti bolyp qaıta saılandy. Apennın túbegindegi elde basqarýshy koalısııadaǵy kelispeýshilikterge qaramastan, memleket basshysy taraptardyń qoldaýyn ıelendi.
Osylaısha, S.Mattarella 759 daýyspen ekinshi jeti jyldyq mandatqa ıe boldy. Premer-mınıstr Marıo Dragı 80 jastaǵy S.Mattarellanyń «eldiń ıgiligi men turaqtylyǵy úshin» qyzmetinde qalǵanyn joǵary baǵalady. S.Mattarella 3 aqpanda otstavkaǵa ketýi kerek edi. Ol munyń aldynda kelesi merzimge saılanǵysy kelmeıtinin birneshe ret aıtqan.
Mattarella jeńiske jetip, daýys berý nátıjesi jarııalanǵannan keıin depýtattar qol soǵyp qoshemet kórsetti. Oqıǵaǵa baılanysty pikir bildirgen M.Dragı: «Serdjo Mattarellanyń respýblıka prezıdenti bolyp qaıta saılanýy ıtalııalyqtar úshin tamasha jańalyq. Parlamenttiń ony ekinshi merzimge qaıta saılaý jónindegi erik-jigerin qoldaǵany úshin alǵys aıtamyn», dedi.