Bıyl qys jumsaq. Bıik kókten bılep, oınap jaýǵan ulpa qar at shashasyn jańa japty. Qysqy týrızmdi óristetýge qapysyz qamdanǵan kásiporyndar ertegideı eliktiretin ásem ólkede esten ketpes qyzǵylyqty demalys uıymdastyrýǵa yntaly.
Kúni keshe ǵana jasyl jelegin jamylyp, qoınaýy dala orkestriniń myń san únimen dúrligip turǵan taý silemderi men shoqylardyń etegi aq kórpesin jamylyp, tynyshtyq qushaǵynda múlgip tur. Qytymyr qystyń da qapysyn tapqanǵa óz qyzyǵy bar. Tap-taza, shyńyltyr muz aıdynnyń ústinde atqan oqtaı zýlap konkı tebýdiń, tý sonaý taý basynan shańǵymen syrǵanaýdyń óz lázzaty bar. Bul tarapta kýrortty aımaqta qysqy týrızmdi damytýǵa ondaǵan sanatorııler men qonaq úıler ázir. Ala jazdaı tabysty týrızmniń jolyn taryltqan jaman tumaýdyń kesirinen ketken esesin qysqy týrızmnen qaýzap jatsa nesi aıyp?! Aqsha qardyń ústinde taý shańǵysymen syrǵanaýdy unatatyndarǵa barlyq qolaıly jaǵdaı týdyrylǵan, óte yńǵaıly oryndar da az emes. Máselen, «Nur taý» taý shańǵysy bazasy. Keshenniń uzyndyǵy 800 metr arqandy jolmen jabdyqtalǵan. Or qoıannyń jymyndaı jalǵyz aıaq jolmen shókken túıedeı jartastardy jaǵalap, butaly betkeıdi kólbeı ótip, sýyldaı sorǵalaý shańǵyny aıaǵyna jańa baılaǵandarǵa da, tájirıbeli sportshylarǵa da qyzyqty bolýy ábden múmkin.
Rixos Borovoe qonaq úıiniń aýmaǵynda qysqy demalysty belsendi ótkizgisi keletin týrıster úshin snoýbordıng, jazǵy demalysty barynsha tıimdi uıymdastyrýǵa baǵyttalǵan veıkbordıng jumys isteıdi. Aıtpaqshy, Býrabaı baýraıynda elimizdegi eń alǵashqy veık-park iske qosyldy. Bul da jaǵymdy jańalyq. Balalardyń qysqy demalysyn kóńildi ári tıimdi ótkizýge barlyq jaǵdaı jasalǵan. Jyl saıyn ústemelenip, mazmuny baıyp kele jatqan jańalyqtyń barlyǵy týrıster aǵynyn barynsha molaıtý úshin jasalyp otyrǵandyǵy belgili. Shýchınsk-Býrabaı kýrorttyq aımaǵyndaǵy «Býrabaı-Lend» taqyryptyq parkiniń ózi nege turady?! Shyn máninde bul qysqy týrızmdi baǵyttaý oraıynda jasalyp jatqan sharýanyń biregeı bitimi. Bul jerde bala qııalyn baıytatyn ertegi keıipkerlerin kezdestire alasyz. Santa Klaýs ta júr, aqyldy haskı, tompıǵan ponı bala kóńildi baýrary daýsyz. Odan ózge de kóńil arbaıtyn kórinis, ilkimdi jańalyq tunyp tur. Máselen, qar basqan qalyń orman ishinde atpen serýendegen qandaı ǵajap?! Qysqy aýany kókiregińniń qumary qanǵansha jutyp, demalýyńyzǵa ábden bolady. Sál sharshasańyz, «Vızıt» ortalyǵynyń aýmaǵyndaǵy jyl boıy úzilissiz jumys isteıtin sholý dóńgelegine bas suǵyńyz. Osyndaǵy qurqyltaıdyń uıasynda jyp-jyly kabınalarda otyryp-aq ańyzǵa tunyp turǵan Býrabaı baýraıyn sholyp shyǵýǵa bolady.
Kókshetaý jalǵyz Býrabaıymen ǵana emes, Zerendisimen de áıgili. Aýdan ákimdigi oblystyq týrızm basqarmasymen birlesip kýrortty aımaqty damytýdyń 2025 jylǵa deıingi josparyn túzgen bolatyn. Aýqymdy jospar kózdegen mejesine qol jetkizýde. Qazir eki týrıstik aımaq birlese, bite qaınasyp ketti dep aıtýǵa da bolady. Oǵan jalpy quny 15,4 mıllıard teńge bolatyn, uzyndyǵy 80 shaqyrymdyq Shýchınsk-Zerendi baǵytyndaǵy avtojol septigin tıgizip otyr. Zerli Zerendidegi kúmis kóldi jaǵalaı qonystanǵan «Parýs», Aurora Garden tárizdi demalys aımaqtary qysqy demalysty qulaı súıetinderge barlyq jaǵdaıdy jasap qoıǵan. Odan ári atshaptyrym jerde «Elikti Park» taý shańǵy bazasy bar. Bul jer de salamatty ári belsendi ómir saltyn ustaıtyn adamdar úshin qys qyzyǵyn belden keshýge yńǵaıly jer.
Búgingi kúni aýdanda birneshe baǵytta týrıstik marshrýttar ázirlenip otyr. Jalǵyz kórkem tabıǵattyń kórinisi ǵana emes, týǵan jerdiń tylsym tarıhyn da zerdeli kókirekke shymshymdap qondyratyn sátimen sabaqtalǵan sapar. Atty da, shańǵyny da qoıa turyp, jup-jumsaq, kirshiksiz, taza, aq qardy keship júrip, máńgi jasyl qaraǵaılar kómkergen jannat mekenniń jer betindegi jumaqtaı pushpaǵyn alshań basyp aralaǵanǵa ne jetsin?!
Alysqa uzap shyqqyń kelmese, Nur-Sultan qalasynyń mańyndaǵy Aqkól, Arshaly, Selınograd jáne Shortandy aýdandarynda da demalys oryndary jeterlik. Bul jerlerge el astanasynan ǵana emes, alys-jaqyn shetelderden at izin salatyndar jyl saıyn kóbeıip keledi. Aqkól qalasyndaǵy ARKA TOUR jaýapkershiligi shekteýli seriktestiginiń shańǵy bazasy – qysqy demalysty qulaı súıetinderdiń súıikti orny. Bul jerde 40 oryndyq qonaqúı, 100 oryndyq meıramhana, fıtnes zal ornalasqan. Qysqy ýaqytta aınadaı jarqyrap jatqan muz aıdyny men shańǵy jolyn paıdalanýǵa ábden bolady. Demalys ortalyǵynyń aýmaǵynda tennıs korty men basseın de bar. Osylaısha, básekelestiktiń bási joǵarylap keledi. Selınograd aýdany da qysqy demalysty uıymdastyrýǵa táp-táýir daıyndalǵan. Shytyrman oqıǵaly jáne ekstremaldy demalys túrleri de qolǵa alynǵan. Aldaǵy ýaqytta osy salaǵa qomaqty qarjy quıatyn ınvestorlardy tartý josparlanyp otyr. Balyǵy taıdaı týlaǵan, kúmis kóldermen aty shyqqan Qorǵaljyn aýdanynda da qysqy demalysty qyzyqty uıymdastyrýdyń ońtaıly joldary bar. Balyqshylardy ornalastyrý úshin qoryqshy kardonynda jaıly qonaq úıler salynǵan.
Visit Aqmola týrıstik aqparat ortalyǵy óńirdegi is-sharalar men qysqy oıyn-saýyqtyń barlyq túrlerine úzbeı monıtorıng júrgizip otyrady. Onyń ishinde áleýmettik jelilerge taratylatyn qysqy qyzmet túrleri týraly málimet te bar. Aqparattyq afıshalar da ilingen. Qysqy týrızmniń ashylýy qarsańynda oblystyq týrızm basqarmasy birneshe márte aqparattyq-jarnamalyq týrlar ótkizdi. Árqıly kórmelerde oblystyń týrıstik áleýeti jan-jaqty kórinis tapqan.
Four seasons kúntizbelik is-sharalar josparyn júzege asyrý aıasynda 24 is-shara ótkizý josparlansa, onyń altaýy qysqy kezeńdi qamtıdy. Bir aıta keterligi, olardyń basym bóligi halyqaralyq mártebege ıe. Iаǵnı sheteldik týrısterdi kóptep tarta otyryp, óńirdiń týrıstik óńin jaqsarta túspek.
Demalys nysandarynyń qyzmet kórsetý aıasyn jaqsartý basty nazarda. Qysqy demalysqa qatysty usynystardy keńeıtip, qapysyz qamdaný úshin «Qysqy ertegi» konkýrsy ótkizildi. Baıqaýdyń basty maqsaty týrısterdiń sany men usynylatyn týrıstik qyzmetter kóleminiń eń jaqsy kórsetishi boıynsha baǵalanbaq. Osylaısha, týrıstik qyzmet nysandarynyń basymdyq baǵyty anyqtalady.
«Býrabaı Damý» jaýapkershiligi shekteýli seriktestigi qysqy demalys túrlerin odan ári damytý maqsatynda shańǵy marshrýtyn uıymdastyrdy. Bul jol «Býrabaı Lend» oıyn-saýyq parkinen «Aınakól» qonaqúıine deıin jalǵasyp jatyr. Jalpy uzyndyǵy 30 shaqyrymǵa jýyq. Dál osy jerde «Ekstrım Park» jumys isteıdi. Oıyn-saýyq parkiniń aýmaǵynda kúımeli shanamen serýendep, atqa minýge ábden bolady. Tipti qazirgi kúni kóp kezdese bermeıtin úsh at jegilgen ertegiler áleminiń shanasyna minýdiń ózi bir qyzyq. Shytyrman joldar, tóbedeı tóńkerilgen tóbeshikter kóńil qyzyqtyryp, ózine tartady.
Osylaısha, kórkem óńirdiń kórikti kelbetin tamashalap, saf aýasyn jutyp, qur atqa mingendeı qýnap shyǵa keletin týrısterdiń babyn tabý baǵaly is. Jan jadyratar jaılylyqty, darhan tabıǵattyń ózi syılaǵan ǵajaıyp kórinisti jiti kóńilmen súzip, qyzyǵyna batqan, dámin tatqan bir kelgen jannyń kúnderdiń bir kúninde qaıta aınalyp soǵary anyq. Ol úshin búginginiń bederin jaqsartyp, beınesin aıshyqtap eńbek etý qajet. Sonda ǵana sonyǵa túsken soqpaqtyń keńeıe túsetindigi belgili.