Senator Aqmaral Álnazarova AITV-juqpasy dıagnostıka jasaýdy básekelestik ortasyna berýdi áli erte dep sanaıdy. Ol Úkimet basshysy Álıhan Smaıylovtyń atyna joldaǵan depýtattyq saýalynda osy máselege alańdaýshylyǵyn bildirdi, dep habarlaıdy Egemen.kz.
Básekelestikti qorǵaý men damytýdyń 2026 jylǵa deıingi jańa tujyrymdamasyna sáıkes AITV ınfeksııasyna dıagnostıka jasaýdy jeke medısınalyq ortalyqtar men zerthanalarǵa berilýi tıis. Alaıda, senator atap ótkendeı, bul bolashaqta eldegi AITV-men aýyrý jaǵdaıyn nasharlatatyn birqatar problemaǵa alyp keletin bolady.
Tujyrymdama AITV dıagnostıkasynyń birinshi kezeńiniń ǵana básekeles ortaǵa berilýin kózdeıdi. Depýtat taldaý nátıjesi oń bolǵan jaǵdaıda, bul berilý joldary men faktorlaryn anyqtaý, baılanys jasaýshylardy izdeý jáne zertteý jónindegi dáıekti tizbektiń buzylýyna ákeledi dep sanaıdy.
«Buryn Qazaqstanda jynystyq jolmen beriletin ınfeksııalar men gepatıtterge zertteý júrgizýdi básekelestik ortaǵa berý tájirıbesi bolǵan. Nátıjesinde biz osy aýrýlardyń taralýyn baqylaýdy joǵaltyp aldyq. Búgingi tańda elde olar boıynsha naqty statıstıka joq jáne tıisinshe osy ınfeksııalarǵa jaýap berý baǵdarlamasy joq», dedi Aqmaral Álnazarova.
Depýtat sondaı-aq halyqaralyq tájirıbedegi keleńsiz derekterdi de atap ótti. Onyń aıtýynsha, kórshi Reseıde de AITV zertteýiniń 1 kezeńi básekelestik ortaǵa berilgennen keıin bul aýrýdyń tez taralýyna ákelip soqqan. Nátıjesinde olar birneshe ret AITV-ınfeksııasynyń dıagnostıkasyn memlekettik medısınalyq mekemelerge qaıtarýǵa májbúr bolǵan kórinedi.
Senator osyǵan oraı Mınıstrler Kabınetiniń basshysyna joldaǵan saýalynda AITV-ınfeksııasyna dıagnostıka jasaýdy tıisti júıeli daıyndyqsyz jáne máseleni muqııat zerttemeı turyp básekelestik ortasyna bermeýdi ótindi.