Asa aýyr salmaq dárejesinde baq synap júrgen horvatııalyq kásipqoı boksshy Fılıp Hrgovıch halyqaralyq boks federasııasy uıymdastyrǵan elımınatorlyq jekpe-jekte baq synap, IBF tujyrymy boıynsha álem chempıony Aleksandr Ýsıktiń mindetti qarsylasy atanýǵa tyrysady, dep habarlaıdy Egemen.kz.
Búgingi kúnge deıin uıym horvatııalyq boksshyǵa qarsylas izdeýmen aınalysty. Alaıda Lýıs Ortıs, Djozef Parker, Tonı Ioka, Mýrat Gasıev, Djo Djoıs bastaǵan kóptegen boksshylar horvat oǵlanymen qolǵap túıistirýden bas tartqan bolatyn. Áıtkenmen asa aýyr salmaq dárejesinde jasyndaı jarqyrap júrgen bylǵary qolǵap sheberine qarsylas tabylǵan sekildi.
Derekterge sensek, qytaılyq Chjan Chjıleı Fılıp Hrgovıchpen kezdesýge kelisimin bergen kórinedi. Bul týraly horvatııalyq boksshynyń komandasy málimdedi.
«Bizdiń oıymyzsha jekpe-jek datasy týraly aldaǵy bir-eki aptada resmı habarlanatyn bolady. Dál qazir bári oıdaǵydaı júrip jatyr. Chjıleı shaıqasqa kelisip qana qoımaı, biz usynǵan qarjylyq máselege kelisimin berdi. Ol da óziniń kezegin kútken boksshy ekeni málim. Jeńiske jetken oǵlan álem chempıony ataǵynan basty úmitker bolmaq. Eki boksshyny da chempıondyq beldik qyzyqtyratyny sózsiz», delingen habarlamada. Fılıp Hrgvovıchti qazaqstandyq boks jankúıerleri de jaqsy tanıdy. Ol kezinde qazaqstandyq «Astana Arlandary» komandasynyń namysyn qorǵaǵan bolatyn.