Joǵarǵy oqý ornyn jańa aıaqtaǵan túlekter úshin jumys taýyp, tájirıbe jınaqtaýǵa múmkindik beretin baǵdarlamanyń biri - jastar praktıkasy. Byltyr Shymkentte 2500-nan astam jas atalǵan baǵdarlamaǵa qatysyp, nátıjesinde 1283-i qaladaǵy túrli mekemeler men kásiporyndarda turaqty jumysqa ornalasqan, dep jazady Egemen.kz.
Baǵdarlama boıynsha turaqty jumysqa ornalasqandardyń biri - Taǵaeva Nazerke Nurlanqyzy. Ol 2019 jyly M.Áýezov atyndaǵy OQMÝ –da «Quqyqtaný» mamandyǵy boıynsha bilim alǵan. Oqý bitirgen soń, qalalyq halyqty jumyspen qamtý ortalyǵynda jumyssyz retinde tirkelip, óz mamandyǵy boıynsha QR Memlekettik qyzmet isteri agenttiginiń Shymkent qalasy boıynsha departamentine 6 aı merzimi boıynsha jastar tájirıbesine joldandy. О́zin bilimdi jas maman retinde kórsetip, keıinnen departament tarapynan QR Strategııalyq josparlaý jáne reformalar agenttigi Ulttyq statıstıka bıýrosynyń Shymkent qalasy boıynsha departamentine turaqty jumysqa ornalasty.
«Qazir memlekettik baǵdarlamanyń tıimdiligin sezinip, rasynda da jastarǵa ýaqytsha jumystan turaqty jumysqa ornalasýǵa múmkindik bar ekendigin aıta alamyn. Búginde men Shymkent qalasynyń statıstıka departamentinde zań bóliminde jetekshi maman retinde qyzmet atqaramyn», dedi Nazerke Nurlanqyzy.
Atalǵan departamentte dál osy memlekettik baǵdarlamanyń arqasynda turaqty jumysqa ornalasqan jastardyń biri – Erjan Beksultan.
M.Saparbaev atyndaǵy OQGI-de «Ekonomıst» mamandyǵy boıynsha bilim alǵan qala turǵyny 2019 jyly statıstıka departamentinde jastar praktıkasynan ótip, keıinnen merzimdik tájirıbeden soń sol mekemede turaqty jumysqa ornalasty. Búginde ol personaldy basqarý bóliminde bas maman retinde qyzmet atqarady.
Jastar arasyndaǵy jumyssyzdyq deńgeıin tómendetý maqsatynda QR Prezıdentiniń tapsyrmasyna sáıkes bıyl «Jastar praktıkasy» baǵdarlamasynyń merzimin 12 aıǵa, al jalaqysyn 30 AEK-deıin kóterý josparlanǵan.
Aıta keteıik,«Jastar praktıkasy» ýaqytsha jumys orny bolyp eseptelinedi. Atalǵan baǵdarlamaǵa 29 jastan aspaǵan «jumyssyz» mártebesi bar jáne sońǵy úsh jyl ishinde (2020,2021,2022j) joǵarǵy oqý oryndary men kolledjderdiń tehnıkalyq jáne kásibı bilim túlekteri qatysa alady. Jalaqysy 25 AEK, ıaǵnı 76 575 teńgeni quraıdy.