QR Indýstrııa jáne ınfraqurylymdyq damý mınıstrligi turǵyn úı qurylysyna úlestik qatysý salasyndaǵy talaptardy qaıta qarap, jer ýchaskelerin konkýrstan tys berý tájirıbesin zańnamalyq túrde alyp tastaýdy josparlap otyr, dep jazady Egemen.kz.
8 aqpanda Memleket basshysy Qasym-Jomart Toqaev QR IIDM-ge 2022 jyldyń mamyr aıyna deıin QR Básekelestikti qorǵaý jáne damytý agenttigimen birlesip qurylys naryǵyn monopolııasyzdandyrý jáne ony básekeli negizde damytý boıynsha sharalar qabyldaýdy tapsyrdy.
Osyǵan baılanysty vedomstvolar salanyń osal tustaryn pysyqtap, negizgi 3 baǵyt boıynsha sharalardy aıqyndady. Olar:
- úlestik qurylysqa qatysýdy retteý;
- jer berý jáne qurylys salýdy josparlaý;
- memlekettik satyp alý rásimderin jetildirý.
«Ázirlengen sharalardy iske asyrý úshin turǵyn úı qurylysyna úlestik qatysý salasyndaǵy talaptardy qaıta qaraý, sondaı-aq Jer kodeksine jáne Memlekettik satyp alýlar týraly Zańǵa ózgerister engizý qajet», dedi QR Indýstrııa jáne ınfraqurylymdyq damý mınıstri Qaıyrbek О́skenbaev Úkimet otyrysynda.
О́zgerister jer ýchaskelerin konkýrstan tys berýdi alyp tastaýdy, zańnamany aınalyp ótýge talpynatyndar úshin jaýaptylyqty kúsheıtý jáne úleskerlerdiń qarajatyn zańsyz tartýdy anyqtaý arqyly úlestik qurylystaǵy talaptardy jetildirýdi kózdeıdi.
«Memlekettik satyp alýǵa qatysty aıtsaq, materıaldyq resýrstardy kórsete otyryp, tender kezeńinde jumys óndirisi jobalaryn usyný mindettemesin engizý; konkýrsqa qatysý úshin satyp alýdyń shekti somasyn belgileý, jumystar men kórsetiletin qyzmet túrleri boıynsha tólengen salyq kórsetkishin shekteý; sondaı-aq qosalqy merdigerlikke qatysty ózara qarym-qatynasty ákimshilendirý, jaýapkershilikti kúsheıtý, beriletin jumystar kólemin shekteý jáne qosalqy merdigerlik jumystar quny boıynsha dempıngti belgileý usynylady», dedi mınıstr.
Onyń aıtýynsha, jaqynda zańnamaǵa engiziletin túzetýlerdiń tıisti paketi ázirlenedi.