BI Group kompanııasynyń basshysy Aıdyn Rahymbaev qazan aıynda 100 myń dollar nemese Nur-Sultan qalasynan 3 bólmeli páter usyna otyryp aýyl mektebiniń dırektorlyǵyna konkýrs jarııalaǵan bolatyn, dep jazady Egemen.kz.
Búgin Aıdyn Rahymbaev áleýmettik jelidegi paraqshasynda 480 úmitkerdiń ishinen iriktelgen pedagogty tanystyrdy. Atalǵan qyzmetke Respýblıkalyq fızıka-matematıka mektebinde dırektordyń orynbasary qyzmeti men laıyqty jalaqy alyp otyrsa da aýyl mektebinde bilim sapasyn kóterýge yntaly bolǵan Aralbek Berikuly laıyq dep tanylǵan.
«Aralbek Berikuly mundaı qadamǵa ýáde etilgen syıaqy úshin emes, aýyl mektebindegi bilim sapasyn jaqsartýǵa shyn peıilimen kiriskenin suhbat-synaq barysynda ańǵardym. Ol osy kezeń barysynda jalaqysynyń qansha bolatynyn múldem suramady. Kerisinshe armanyndaǵy mektepti salý josparyn, onda júrgiziletin jańa ádis-tásilderdi zor qulshynyspen jetkizdi. Tipti resmı buıryqty kútken úsh aıdyń ishinde aýyl muǵalimderi men oqý úlgerimi tómen oqýshylarmen jumysty bastap ketti», dep jazdy Aıdyn Rahymbaev.
Sondaı-aq, BI Group kompanııasynyń basshysy tańdalǵan kandıdatpen aýyl mektebin qaıta salýdy ǵana emes, osyndaı mektepterdegi bilim sapasyn ilgeriletetin biregeı modýldi synap kórýge keliskenin aıtty.
Úzdik pedagog bas qaladan Aıdyn Rahymbaevtyń aýylyna otbasymen birge, 5 balasymen kóshken.
Aıdyn Rahymbaev óz kezeginde Aralbek Berikulynyń aýyl mektebin basqarý buıryǵyna oń sheshim tanytqan QR Bilim jáne ǵylym mınıstri Ashat Aımaǵambetovke alǵys aıtty.
Aıta keteıik, úzdik pedagog endi ShQO, Kókpekti aýdany, Kaznakovka aýylynda (Qulynjan), О́skemen qalasynan 160 shaqyrym qashyqtyqta ornalasqan bilim ordasyn basqarady.