О́ńir koronavırýs indetin juqtyrý kórsetkishi boıynsha «sary aımaqtyń» sanatyna engenimen, jalpy epıdemııalyq ahýal máz emes. Sondyqtan da indettiń beti birjola qaıtty dep arqa-jeńdi keńge salýǵa bolmaıdy.
Aımaqta sońǵy táýlikte indet juqtyrýdyń seksenge jýyq jaǵdaıy tirkeldi. Oblys elimiz boıynsha altynshy orynda. Jyl basynan beri 18 733 adamnan koronavırýs zerthanalyq jolmen anyqtalyp, 40-qa jýyq adam indetten kóz jumdy. Aqpan aıynda ǵana saqtyq sharalaryn qoldanbaýdyń kesiri kórine bastady. Qazir adamdardyń eti ólip ketken. Alǵashqy bettegideı betperde taǵý, sanıtarlyq talaptardy buljytpaı saqtaý bosańsı bastady. Salǵyrttyqtyń saldary da kózge kórinip tur. Aqpan aıynda 4 167 adam indetke shaldyqty.
– Búgingi tańda oblys aýrýhanalarynda 20-ǵa jýyq naýqas óte aýyr halde jatyr. Bir aıta keterligi, indet juqtyrǵandardyń basym kópshiligi 60 jastan asqandar, – deıdi oblystyń bas sanıtarlyq dárigeri Aınagúl Mýsına, – óńirde jasy 60-tan asqan 100 myńnan astam adam bar. Olardyń 59 paıyzy indetke qarsy ekpe alsa, 10 myńnan astamy revaksınalaýdan ótken. Sóz arasynda revaksınalaýdan ótpegen egde adamdar indet juqtyra qalsa, qaýippen kúresý qıyn bolatynyn taǵy bir qaıtalap aıtqym keledi. Ashyǵyn aıtqanda, múlde ekpe almaǵan adamdar qaharly koronavırýs bylaı tursyn, «omıkronǵa» da tóze almaıdy. Al eger ýaqytynda vaksına alǵan bolsa, qaı shtamy bolsyn jeńil ótedi.
Vaksına alýǵa barlyq jaǵdaı jasalǵan. Oblysta qazir 133 pýnkt turaqty jumys istep tur. Ekpe naýqany bastalǵannan beri vaksınanyń birinshi komponentimen 347 946 adam egilgen. Bul oblys turǵyndarynyń 47,3 paıyzy. Vaksına saldyrý boıynsha Egindikól aýdany men Qosshy qalasynyń turǵyndary jospardy 100 paıyzǵa oryndap, kósh bastap keledi. Bas sanıtarlyq dárigerdiń aıtýyna qaraǵanda, halyqqa qolaıly bolýy úshin ekpe pýnktteri janynan jyljymaly brıgadalar da uıymdastyrylǵan. Olar júkti áıelder men bala emizetin analardyń, zeınetkerlerdiń, múmkindigi shekteýli jandardyń ótinishi boıynsha úılerine baryp ekpe egedi.
– Búgingi tańda 8 805 adam Pfizer vaksınasyn aldy. Bul – óte tómen kórsetkish. Qazir biz jasóspirimder arasynda da indettiń etek alyp bara jatqanyn kórip otyrmyz. Jyl basynan beri mektep oqýshylary arasynda indetke dýshar bolý derekteri kóbeıip ketti. Tipti stýdentterge qaraǵanda, oqýshylardyń arasynda alańdatarlyq jaǵdaı týyndap otyr. Munyń barlyǵy ekpe almaǵannyń kesiri. Balalardyń boıynda indetke qarsy ımmýnıtettiń bolmaýy osyndaı olqylyqqa jol berip otyr, – deıdi bas sanıtarlyq dáriger.
Eger vaksınanyń birinshi komponentin alǵandar 21 kúnnen keıin ekinshisin saldyrmaıtyn bolsa, onda olardyń Ashyq qosymshasyndaǵy mártebeleri kók túske ózgeredi. Ázirge «sary aımaqtyń» sanatynda bolǵanymyzben, qaýiptiń qateri qaperimizde júrgeni jón.
Aqmola oblysy